სიმართლის დრო
იტალიური „ფიორენტინას“ რუმინელი ფორვარდი, ადრიან მუტუ, დოპინგზე „ჩავარდა“ და გრძელვადიანი დისკვალიფიკაციაც ელის. მუტუს იგივე დაემართა რამდენიმე წლის წინაც, მაგრამ მაშინ კოკაინზე გამოიჭირეს და ექვსი თვით „მოკვეთეს“, ცოლმაც მიატოვა – ვანდა ჰედერმა განაცხადა, ნარკომან ქმართან ვერ ვიცხოვრებო და წავიდა. მუტუ განიკურნა, ჩვეულადაც ათამაშდა და ვანდამაც დაბრუნება გადაწყვიტა, მაგრამ ფეხბურთელმა აღარ მიიღო. როგორც ჩანს, სწორედ ეს ჩაიდო გულში ქალმა და, როგორც კი ადრიანს „ფეხი მეორედ დაუცდა“, ყოფილ ქმარს „სიმართლის დრო“ მოუწყო.
– მუტუ უნებისყოფოა და ამიტომაც ემართება ხოლმე ასე. დარწმუნებული ვარ, მას ჰქონდა იმის შანსი, სხვაგვარად მოქცეულიყო, მაგრამ იოლი გზა აირჩია, რადგან მთელი ცხოვრება ასე იქცეოდა. იგი წარმატებას ვერასოდეს მიაღწევს, – განაცხადა ვანდამ, რომელიც საარსებო ფულს ფიტნეს-მწვრთნელობით შოულობს, მაშინ, როცა მის წარუმატებელ ქმარს წლიურად 3 მილიონი ევრო აქვს.