რატომ არ შეიძლება ბილეთის გაყიდვა
28 თებერვალს ინგლისის ლიგის თასის ფინალში ერთმანეთის პირისპირ „მანჩესტერ იუნაიტედი“ და „ასტონ ვილა“ დადგებიან. როგორც წესი, მატჩის წინ კლუბის წევრებისა და მომუშავე პერსონალისთვის ბილეთების გარკვეული რაოდენობაა გამოყოფილი და მათ უფასოდ ურიგებენ. „ასტონ ვილაც“ ასე მოიქცა და ფინალზე დასასწრები ბილეთები ახალგაზრდული გუნდის ფეხბურთელებსაც შეხვდათ. ჰოდა, ერთ-ერთმა მათგანმა, კერძოდ კი ნეთენ ბეიკერმა, კუთვნილი ორი ბილეთის გაყიდვა გადაწყვიტა და ამის შესახებ განცხადება „ფეისბუქზე“ გააკეთა. ეს ამბავი კი კლუბის ხელმძღვანელებმა შეიტყვეს და...
– ბილეთები არა გასაყიდად, არამედ იმისთვის რიგდება, რომ იგი კონკრეტულად კლუბის წევრებმა გამოიყენონ. ბეიკერი ახალგაზრდაა და, ბოროტი განზრახვა რომ არ ჰქონდა, იქიდანაც ჩანს, რომ მან ბილეთების გაყიდვა მალულად კი არა, საჯაროდ გადაწყვიტა. ამის მიუხედავად, მას დაუსჯელად ვერ დავტოვებთ და მატჩზე დასასწრებ ორივე ბილეთს ჩამოვართმევთ, – ასეთია კლუბის პოზიცია, მაგრამ, თავად ფეხბურთელს დღემდე ვერ აუხსნია, რატომ არ შეიძლება იმ ბილეთების გაყიდვა, რომელიც მას აჩუქეს.