“მუსიკის ჰანგები„ მუსიკისა და დრამის თეატრში
მუსკომედიის თეატრი ყოველთვის ძალიან საინტერესო, მასშტაბურ მუსიკალურ სპექტაკლებს გვთავაზობს. იანვარში ქართველ მაყურებელს დათო დოიაშვილმა მიუზიკლი „მუსიკის ჰანგები“ აჩუქა და არაჩვეულებრივი სანახაობით დაატკბო თეატრში მისული მაყურებელი. სპექტაკლში ქართული სცენისა და ესტრადის ნამდვილი ვარსკვლავები თამაშობენ: რეზო ჩხიკვიშვილი, ნატო მეტონიძე, ეკა კახიანი, ლაშა რამიშვილი, გიორგი ყველაშვილი, ბუბა გოგორიშვილი. განსაკუთრებით საინტერესოები იყვნენ „ანა-ბანას“ პატარა კონკურსანტები, რომლებიც ბარონ ფონტრაპის მცირეწლოვან შვილებს ასახიერებენ და არაჩვეულებრივად ასრულებენ როლებს. სპექტაკლის დეკორაციის მხატვარი გიგა ლაპიაშვილია, კოსტიუმების კი – ანანო მოსიძე. ნიკა მემანიშვილის მუსიკა, ორკესტრი, მსახიობების უნიკალური შესრულება და დათო დოიაშვილის არაჩვეულებრივი რეჟისურა ისე აჯადოებს მაყურებელს, რომ სპექტაკლისთვის განკუთვნილი ორი საათი დასანანებლად სწრაფად გადის.