„თბილისელების“ სამზარეულო
შემწვარი ღორის ხორცი ლიმონით
საჭირო ინგრედიენტებია: 1,5 კილოგრამი ღორის ხორცის რბილი ნაჭერი, მარილი, შავი პილპილი, 1 ლიმონი, 1 თავი ნიორი, 4 სადილის კოვზი ზეთი (სასურველია ზეითუნის), 3 ცალი დაფნის ფოთოლი, 750 გრამი სტაფილო, 2 ცალი ფორთოხალი, 1 ჩაის კოვზი თაფლი, 1/2 ჩაის კოვზი დარიჩინი.
მომზადების წესი: ხორცი გარეცხეთ, შეაშრეთ. წაუსვით მარილი და შავი პილპილი. ლიმონი გაჭერით ოთხ ნაწილად. ტაფაზე, ცხელ ზეთში კარგად შებრაწეთ ხორცი ორივე მხრიდან. დაასხით 100 მილილიტრი წყალი. დაუმატეთ ნიორი, დაფნის ფოთოლი და ლიმონი. დაახურეთ თავსახური და შუშეთ 70 წუთი. პერიოდულად ხორცი გადააბრუნეთ. სტაფილო გაფხიკეთ, ჩააწყვეთ ქვაბში, დაასხით ცოტა წყალი და ფორთოხლის წვენი. ხარშეთ 15 წუთის განმავლობაში. მოამზადეთ პიურე. შეურიეთ თაფლი, მარილი, დარიჩინი და პილპილი ცოტა ბლომად. მიირთვით სტაფილოს პიურე ხორცთან ერთად.