მანჩინიმ „სიტის“ მენიუში ღვინო შეიტანა
როცა ფაბიო კაპელო ინგლისის ეროვნული გუნდის მწვრთნელად დანიშნეს, ერთ-ერთი პირველი, რაც მან გააკეთა, ნაკრების მენიუში ცვლილებების შეტანა იყო: იქიდან კეტჩუპი და კარტოფილის „ფრი“ ამოიღო და მაკარონი, ქათმის ხორცი და შავი ღვინო დაუმატა. ახლა კი, თითქმის ანალოგიურად, „მანჩესტერ სიტის“ იტალიელი თავკაცი, რობერტო მანჩინი მოიქცა.
– ფეხბურთელთა სწორი კვება ძალიან მნიშვნელოვანია. ამიტომ, პირადად გავაკონტროლებ, ვინ რას მიირთმევს. გამიკვირდა, როცა კლუბის მენიუში შავი ღვინო ვერ ვნახე. სადილზე ერთი ჭიქა ღვინო აუცილებელია. ასევე, აუცილებელია მსუყე იტალიური პიცა და ნახშირწყლებით მდიდარი მაკარონი. მაკარონს ფეხბურთელები მატჩის წინ აუცილებლად შეჭამენ და მოედანზე კი არ ივლიან, იფრენენ. მომავალში რამდენიმე სიახლე კიდევ იქნება და რაციონი შეიცვლება. მართალია, მენიუში ქათმის ხორცი არის, მაგრამ მისი რაოდენობა უნდა გაიზარდოს, – აცხადებს მანჩინი.