ქართული სერიალები დაიხურა
ორ წამყვან ტელეარხზე ახალ ქართულ სერიალებს ძალიან ბევრი მაყურებელი ჰყავდა და სერიოზული პოპულარობით სარგებლობდა. ცოტა ხნის წინ ცნობილი გახდა სერიალ „ჟამი ყვავილობისას“ შეწყვეტის შესახებ, მაგრამ, რამდენიმე დღის წინ გავრცელებულმა ინფრომაციამ, რომ სერიალი „კლინიკაც“ დაიხურა, დიდი მითქმა-მოთქმა გამოიწვია. არადა, როგორც არ უნდა დამადანაშაულოთ სუბიექტურობაში, ქართულ სატელევიზიო სივრცეში „კლინიკა“ ერთ-ერთი ყველაზე საინტერესო და, რაც მთავარია, ხარისხიანი პროექტი იყო, რომელსაც სხვადასხვა ასაკისა და გემოვნების მქონე მაყურებელი ერთნაირი ინტერესით უყურებდა. „კლინიკის“ დახურვის მიზეზი ჯერჯერობით უცნობია, თუმცა, ერთ-ერთ შესაძლო მიზეზად მაინც ფინანსები სახელდება, რაც სერიალს დიდი რაოდენობით სჭირდებოდა. მაგრამ, როდესაც საქმე ამხელა პროექტს ეხება – სერიალს, რომელიც, ალბათ, ძალიან კარგად გაიყიდებოდა სხვა ქვეყნებშიც, დიდი ფინანსები თავიდანვე გათვალისწინებული უნდა ყოფილიყო. თუმცა ახლა უკვე გვიანია მსჯელობა. ფაქტი კი ერთია: ბოლო წლების ერთ-ერთი ყველაზე გემოვნებიანი ქართული პროექტი უკვე დაიხურა.