მკვდარი მკვდარს აეკიდა...
გასულ კვირას კენიაში აფრიკის ქვეყნების თამაშები გაიმართა. ტურნირი წარმომადგენლობითი არ იყო, ამიტომ მონაწილეობა მხოლოდ ათამდე ქვეყანამ მიიღო და მათ შორის ერითრიის საფეხბურთო ნაკრებიც იყო. ტურნირის დასრულების შემდეგ ერითრიელები სამშობლოში უნდა დაბრუნებულიყვნენ, მაგრამ, როცა თვითმფრინავი აეროპორტში დაეშვა, იქიდან მხოლოდ მწვრთნელი და მისი თანაშემწეები გადმოვიდნენ. ფეხბურთელები, მასაჟისტები და სხვა პირები კი კენიაში დარჩნენ და ამ ქვეყანას ლტოლვილის სტატუსი მოსთხოვეს.
– ერითრიაში არსებული რეჟიმით უკმაყოფილო ვართ და სამშობლოში დაბრუნებას არ ვაპირებთ. გვინდა, რომ კენიელებმა ლტოლვილის სტატუსი მოგვცენ და აქ დავრჩეთ მანამ, სანამ ჩვენს ქვეყანაში ხელისუფლება არ შეიცვლება, – ასეთია ფეხბურთელთა განცხადება, კენიის ხელისუფლება კი საგონებელშია ჩავარდნილი. ჩვენი თავი გაგვჭირვებია და ახლა კიდევ დამატებით მშიერ ხალხს რა ვუყოთო.