მზარეული ოჯახით
25 დეკემბერს, კათოლიკეთა შობაზე, ბრიტანეთში დიდი ამბებია ხოლმე. იმის გათვალისწინებით, რომ დევიდ ბექჰემისთვის ამერიკული სეზონი დასრულდა და მას იანვრამდე შვებულება აქვს, იგი შობას სამშობლოში შეხვდება, მაგრამ სურს, რომ ყველაფერი, რასაც ამ დღეს მიირთმევს, გემრიელი იყოს. ამიტომაც, მან ცნობილ მზარეულს, გორდონ რეიმსს უთხრა, შობისთვის სადილი გაგვიმზადეო და თავიდან უარიც მიიღო, მაგრამ, ხომ გაგიგიათ, ვისაც ფული აქვს, ქეიფსაც ის უკვეთავსო.
„უარი ვთქვი, რადგან მინდოდა, შობას ცოლთან და ოთხ შვილთან ერთად შევხვედროდი. ბექჰემმა მითხრა, შენი ცოლ-შვილიც აქ მოიყვანე, ოთახს გამოგიყოფთ, მაგრამ სადილი თვითონ უნდა გაამზადოო. რადგან დევიდსა და ვიქტორიას ჩემი ნახელავი ასე მოსწონთ, გადავწყვიტე, დავთანხმდე, მაგრამ ცოლ-შვილს ბექჰემების სახლში აუცილებლად წავიყვან,“ – განაცხადა რეიმსმა.