ქართველ-ამერიკელი მხატვარი, რომელზეც ჩვენი ჟურნალის ფურცლებიდან უკვე გიყვებოდით, დავით-დათუნა აიფონისთვის წარმოადგენს აპლიკაციას, რომელიც ნებისმიერ მფლობელს შეუძლია, ჩამოტვირთოს. მხატვარმა „გლობალ არტ ფონდთან“ ერთად შექმნა დამატება, ეგრეთ წოდებული პროგრამა „ვიუპოინტს”, რომელიც საშუალებას იძლევა, მხატვრის მიერ მოფიქრებულ უცნაურ მანერაში გადაკეთდეს ესა თუ ის ფოტო, კერძოდ, დაედოს მას ოპტიკური ეფექტები, რომლის მისაღებადაც მხატვარი სხვადასხვა ფორმისა და ზომის ლინზას იყენებს. ამით სხვადასხვა ადამიანისა თუ მოვლენის ახლებურ, სრულიად ორიგინალურ აღწერილობას ვიღებთ. საბოლოო ჯამში, მიღებული ფოტო, შეგვიძლია, თავისუფლად გავუგზავნოთ მეგობრებს ან განვათავსოთ სოციალურ ქსელებში.
დავით-დათუნა: „გლობალ არტ ფონდთან“ ერთად თავბრუდამხვევი აპლიკაცია შევქმენით, რომელსაც ხელოვნების ენა მობილურ ფორმატში გადაჰყავს. ადამიანები საგნებს სუბიექტურად აღიქვამენ, თავად წყვეტენ, ლამაზია ის თუ მახინჯი, კარგია თუ ცუდი. ეს აპლიკაცია თვითგამოხატვის საშუალებას აძლევს აიფონის ყველა მფლობელს. ასე რომ, არავის შეეშინდეს, თუ ვინმე ვერ გაუგებს.