„მანჩესტერი“ რუნის კვირაში 170 ათას სთავაზობს
„მანჩესტერ იუნაიტედის“ ფორვარდ უეინ რუნიზე თვალი კატალონიურ „ბარსელონას“ აქვს დადგმული და რამდენიმე კვირის წინ „შრეკი“ „რეალში“ კრიშტიანუ რონალდუმაც დაპატიჟა. მართალია, თავად უეინი აცხადებს, რომ გუნდის გამოცვლას არ აპირებს, მაგრამ არავინ იცის, საინტერესო წინადადების შემთხვევაში, რა ჭკუაზე დადგება.
ჰოდა, ლოგიკურიც იყო, რომ „მანიუს“ ბანაკიდან რუნისთან მოლაპარაკების დაწყების შესახებ გავრცელდა ცნობები. მართალია, ოფიციალურად ჯერჯერობით არც ერთი მხარე არაფერს ამბობს, მაგრამ კულუარული ინფორმაციით, „წითელი ეშმაკები“ მზად არიან უეინი პრემიერლიგის ყველაზე მაღალანაზღაურებად მოთამაშედ აქციონ და კვირაში 170 ათასი ფუნტი გადაუხადონ, რაც წლიურად 8.84 მილიონი გირვანქა გამოვა და წესით, ეს „ოლდ ტრაფორდზე“ უეინის დასაბმელად საკმარისი უნდა იყოს.