2012 წელი საქართველოში ვაჟა-ფშაველას საიუბილეო წლად გამოცხადდა. კულტურულ-საგანმანათლებლო ცენტრებში, საჯარო სკოლებსა თუ უმაღლეს სასწავლებლებში ჩატარდა კონკურსები სწორუპოვარი შემოქმედის წარმოსაჩენად. ვაჟა-ფშაველაზე ბევრი ითქვა და დაიწერა, მაგრამ, მის ბიოგრაფიაში ჯერ კიდევ არსებობს ბურუსით მოცული ისტორიები, რის შესახებაც ძალიან კარგად იცოდნენ ვაჟა-ფშაველას შემოქმედების მკვლევრებმაც და მონოგრაფიათა ავტორებმაც. მაგრამ, სიმართლის გაცხადებას ხან კომუნისტური რეჟიმი და ცენზურა უშლიდა ხელს, ხან თავად მკვლევრებს არ სურდათ აუტკივარი თავის ატკიება. „თბილისელების“ სტუმარია ვაჟა-ფშაველას შემოქმედების ერთ-ერთი თვალსაჩინო მკვლევარი გიგი ხორნაული, რომელიც არ შეუშინდა არანაირ წნეხს და, სარწმუნო არგუმენტებზე დაყრდნობით, შექმნა უტყუარი და ჭეშმარიტი მონოგრაფია. ბატონი გიგი აღნიშნული მონოგრაფიიდან იმ სკანდალურ ფაქტებზე გვესაუბრება, რაც, რასაკვირველია, ოდნავაც არ აყენებს ჩრდილს დიდ გენიოსს, ვაჟა-ფშაველას.