ბურუნდის ფეხბურთის ასოციაციის პრეზიდენტი ლიდია ნსეკერა „ფიფას“ აღმასკომის წევრი გახდა. ეს არის პირველი შემთხვევა, როდესაც მსოფლიო ფეხბურთის მმართველი ორგანიზაციის აღმასკომის წევრად ქალი აირჩიეს. მანამდე ნსეკერა „ფიფას“, რამდენიმე კომიტეტის წევრი იყო, მათ შორის ქალთა მსოფლიო ჩემპიონატის ორგანიზაციისა და ოლიმპიურ თამაშებზე ქალთა ფეხბურთის საორგანიზაციო კომიტეტის. თუმცა, აღმასკომის წევრობა სულ სხვა „განზომილებაა” მსოფლიო ფეხბურთში. ნსეკერას კანდიდატურა „ფიფას“ ბუდაპეშტში მიმდინარე კონგრესზე დამტკიცდა. ამას გარდა ცნობილი გახდა, რომ 2013 წლის კონფედერაციის თასს, რომელიც მსოფლიო ჩემპიონატამდე ერთი წლით ადრე მასპინძელ ქვეყანაში ტარდება, ექვსი ბრაზილიური ქალაქი უმასპინძლებს:  ბრაზილია, ბელუ-ორიზონტი, ფორტალეზე, რიო-დე-ჟანეირო, რესიფე და სალვადორი.