ესპანურმა „ბარსელონამ” ახალი ფორმის დიზაინის პრეზენტაცია გამართა, რომლითაც კატალონიელები მომდევნო სეზონში იასპარეზებენ. პრეზენტაცია ბარსელონას თანამედროვე ხელოვნების მუზეუმში შედგა. წინა სეზონის ამუნიციის მსგავსად, მაისურის წინა მხარეს „ბარსელონას” სპონსორის, „კატარ ფაუნდეიშენის” ემბლემა დაამშვენებს, ხოლო უკანა მხარეს „იუნისეფის“ ემბლემა იქნება. კლუბის წარმომადგენლების თქმით, „ბარსას” ახალი ფორმა კლუბის ფილოსოფიის გამოხატულებაა. საგარეო თამაშებზე კლუბი ტრადიციულად, ნარინჯისფერი მაისურებით ითამაშებს. ეს ფერი, კლუბის წარმომადგენლების თქმით, საუკეთესოდ ასახავს კატალონიის დედაქალაქის არქიტექტურას, კულტურას, სტილსა და ხელოვნებას.