კითხვა:  ვარ 26 წლის. დაახლოებით ორი კვირაა, მკვეთრად გამიძლიერდა მადა. 7 წლის წინ მოვიკელი 11 კილოგრამი და მას შემდეგ ჩემი წონა არ შეცვლილა. ორსულობა გამორიცხულია. რა უნდა იყოს ამის მიზეზი?

პასუხი: მადის ასეთი მკვეთრი გაძლიერების მიზეზი მრავალნაირია: ემოციური გადაძაბვა (სტრესი), გაძლიერებული ფიზიკური დატვირთვა, რომელიმე ორგანოს დაავადება და ასე შემდეგ. მიზეზის დასადგენად საჭიროა კომპლექსური გამოკვლევა, დაიწყეთ ფარისებრი ჯირკვლით (ექოსკოპია, ჰორმონული ანალიზი).

კითხვა:  შესაძლებელია თუ არა, პროსტატის ადენომა ონკოლოგიურ სიმსივნეებში გადაიზარდოს?

პასუხი: პროსტატის ადენომა კიბოში ტრანსფორმაციას არ განიცდის. პროსტატის კიბოს პირველადი დიაგნოსტიკისთვის საჭიროა: სისხლის ანალიზი პროსტატსპეციფიკურ ანტიგენზე, რექტალური გამოკვლევა და წინამდებარე ჯირკვლის (პროსტატის)  ექოსკოპია.

კითხვა:  მაქვს სერიოზული პრობლემა – პირიდან არასასიამოვნო სუნი, მიუხედავად იმისა, რომ პირის ღრუს სერიოზულად ვუვლი. რა შეიძლება მოვიმოქმედო?

პასუხი: პირის ღრუდან უსიამოვნო სუნის მიზეზი შეიძლება იყოს: სტომატოლოგიური პრობლემები, პირ-ხახის, ფილტვების ან კუჭის დაავადებები. მსგავს სიმპტომებს იწვევს კუჭის ევაკუატორული ფუნქციის დარღვევა ან ჰელიკობაქტერ პილორის ინფექციის არსებობა. უნდა ჩაიტაროთ (გამოკვლევები გასტროენტეროლოგის დანიშნულებით).

კითხვა:  საშიშია თუ არა განგრენული აპენდიციტი?

პასუხი: განგრენული აპენდიციტი სიცოცხლესა და ჯანმრთელობას დიდ საშიშროებას უქმნის, რადგან, შესაძლებელია  პერიტონიტის განვითარება.  

კითხვა:  ორი კვირის წინ მქონდა „კვინკეს შეშუპება” (საკვებისმიერი ალერგია). დამსვეს მკაცრ დიეტაზე. როდის შეიძლება ნორმალური კვების დაწყება?

პასუხი: მკაცრი დიეტა აუცილებელია ორი კვირის განმავლობაში, რაციონის თანდათანობითი გაფართოებით. მოერიდეთ მჟავე, ცხარე, შემწვარ-მოხრაკულ, ცხიმიან საკვებს, ციტრუსებსა და ალკოჰოლურ სასმელებს.

კითხვა:  აქვს თუ არა შიდსს სიმპტომები, რომლებიც ადრეულ ეტაპზე გამოვლინდება?

პასუხი: იმუნოდეფიციტის ვირუსი, შესაძლოა,  დიდი ხნის (წლების) განმავლობაში არ გამოვლინდეს. მხოლოდ მაშინ, როცა ვითარდება იმუნოდეფიციტი – დაავადების ბოლო სტადია (რომელსაც, კერძოდ, შიდსი ეწოდება), ვითარდება გაუთავებელი ინფექციები, რომლებიც მკურნალობას არ ექვემდებარება, ასევე, ონკოლოგიური დაავადებები და ასე შემდეგ.

კითხვა:  შეიძლება თუ არა 17 კვირის ორსულისთვის დუნდულაზე ჩირქგროვის მკურნალობა ვიშნევსკის მალამოთი?

პასუხი: ორსულობის დროს კანზე ჩირქოვანი წარმონაქმნების სამკურნალოდ მიზანშეწონილია უფრო ეფექტური და ნაკლებად ტოკსიკური სამკურნალო პრეპარატების გამოყენება. თვითმკურნალობას არ გირჩევთ, მიმართეთ თქვენს მკურნალ ექიმს!

კითხვა:  რა არის ქრონიკული შეკრულობა?

პასუხი: შეიძლება, ბევრს ჰქონია, რომ ეს არც ისე მნიშვნელოვანი პრობლემაა, მაგრამ, ქრონიკული ყაბზობა (შეკრულობა) ორგანიზმში ბევრი უსიამოვნო შეგრძნების მიზეზი შეიძლება გახდეს: მუცლის შებერილობის, თავის ტკივილის, გაღიზიანების. ასევე, შესაძლოა, იმოქმედოს შრომისუნარიანობაზე და ხალხში გასვლაზეც კი უარი ათქმევინოს ადამიანს. ქრონიკული ყაბზობის დროს კუჭის მოქმედება ხდება არაუხშირეს 3-ჯერ კვირაში, რამდენიმე თვის განმავლობაში.

რუბრიკას უძღვება ოჯახის ექიმი