რუსმა ჩოგბურთელმა მარია შარაპოვამ კონტრაქტი გააფორმა კორეულ კომპანია „სამსუნგთან” და ხელშეკრულების თანახმად, 2012 წლის 1 აპრილიდან სამი წლის განმავლობაში კომპანიის სახე იქნება. კონტრაქტიდან გამომდინარე, შარაპოვა რეკლამას გაუწევს „სამსუნგის” პროდუქტებს – მობილურ ტელეფონებს, პლანშეტურ კომპიუტერებს და ტელევიზორებს. კონტრაქტის პირობები არ ხმაურდება, თუმცა ცნობილია, რომ „ნაიკთან” თანამშრომლობის პერიოდში, შარაპოვამ 70 მილიონი დოლარი მიიღო. გარდა ამისა, სხვადასხვა დროს შარაპოვა რეკლამას უწევდა: „ტაგ ჰაუერს”, „მოტოროლას”, „სონი ერიქსონს”, მინერალურ წყალს „ევიან” და „ტიფანი ენდ კოს”. შეგახსენებთ, რომ „ფორბსის” ბოლო მონაცემებით, მარია შარაპოვა პლანეტის ყველაზე მაღალანაზღაურებადი ქალი სპორტსმენია და მისი წლიური შემოსავალი 25 მილიონ დოლარს შეადგენს.