ოლიგარქის, სულეიმან ქერიმოვის ფულით გათამამებული მახაჩკალის „ანჟი” სკანდალურ განცხადებებს ავრცელებს. კლუბის დირექტორის, ლეგენდარული ბრაზილიელის, რობერტო კარლოსის თქმით, რუსული კლუბი ეცდება ლიონელ მესისა და კრიშტიანუ რონალდუს გადმობირებას, მას შემდეგ, რაც სუპერვარსკვლავებს კონტრაქტები დაუმთავრდებათ თავიანთ კლუბებთან. ესპანურ „რადიო მარკასთავის” მიცემულ ინტერვიუში კარლოსმა აღნიშნა, რომ მესის პლანეტის საუკეთესო ფეხბურთელად მიიჩნევს, თუმცა, რონალდუსთან მის შედარებას არ აპირებს, რადგან ორივე უნაკლო ფეხბურთელია. აღსანიშნავია, რომ თავად კარლოსი რამდენიმე ხნის წინ გუნდის განაცხადიდან გამოიყვანეს და ამჟამად კლუბის დირექტორის თანამდებობაზე მუშაობს. მსოფლიოს ჩემპიონი ადრინდელ ინტერვიუებში აცხადებდა, რომ სპორტულ კარიერას 2012 წლის ბოლოს დაასრულებდა. თუმცა, როგორც ჩანს, რობერტო კარლოსმა ბუცები ლურსმანზე უკვე ჩამოკიდა.