კითხვა: რა ძალები ეღობება ადამიანს სასუფევლისკენ მიმავალ გზაზე?

პასუხი: სასუფევლის მოსაპოვებლად მიმავალ გზაზე ადამიანს სამი უმთავრესი მტერი ეღობება: პირველი არის ხორციელი ზრახვები, ადამიანის ცოდვით ვნებული ბუნება; მეორე – ურწმუნო ადამიანები, ცოდვით დაცემულნი და, მესამე – ეშმაკი. ისინი უბიძგებენ ადამიანს ცოდვისკენ, რათა ის განუდგეს უფალს და დაკარგოს ცათა სასუფეველი.

კითხვა: ამჟამად ვცხოვრობ ისეთ რაიონში, სადაც თავს მარტოდ ვგრძნობ, გვერდით არავინ მყავს, ვისაც ჩემს განცდებს გავუზიარებ და გულს გადავუშლი. გთხოვთ მირჩიოთ, როგორ დავიხსნა თავი დეპრესიისგან?

პასუხი: თქვენი ტანჯვის მიზეზი არის არაეკლესიურობა. დაიწყეთ რელიგიური ცხოვრება:  იკითხეთ ლოცვები, ეზიარეთ, გაეცანით მამათა ცხოვრებას და მარტოობის შეგრძნება გაგიქარდებათ. წმიდა მამები მოშორებულნი იყვნენ ახლობლების წრეს, მაგრამ, სავსენი იყვნენ საღვთო მადლით.

კითხვა: შეიძლება თუ არა, ბავშვი მოვნათლოთ მარხვის პერიოდში?

პასუხი: ნათლობა ყოველთვის შეიძლება. როგორც წესი, ორმოცი დღის ბავშვი,  უკვე უნდა მოინათლოს. თუმცა, თუ თქვენ გსურთ, რომ ნათლობა სახსნილო სუფრით აღნიშნოთ (სამწუხაროდ, ჩვენში ასე ხშირად ხდება), მარხვაში ეს არაქრისტიანული საქციელია.

კითხვა: წლების წინ დავკარგე ნათლობის ჯვარი, რაც ძალიან განვიცადე. საბედნიეროდ, ახლა სრულიად შემთხვევით ვიპოვე თეთრეულში ჩადებული. მაინტერესებს, ხომ არ დაკარგა მან ძალა?

პასუხი: ჯვარი არ კარგავს თავის ძალას ჟამთა ვითარებაში, მაგრამ, თუ ის დაუდევრობით გაჭუჭყიანდება (მაგალითად, მიწით დაისვრება), უნდა გაიწმინდოს და თავიდან აკურთხებინოთ.