სოფო ნიჟარაძის პროექტის ფარგლებში „ბრავო რეკორდსმა” უპრეცედენტო თანამშრომლობა განახორციელა. პროექტი გულისხმობს ქართველი ვარსკვლავისთვის ორი – ქართულ და უცხოურენოვანი დისკების ჩაწერას. სოფო დუეტს ჩაწერს პოპ-მუსიკის ამომავალ ვარსკვლავთან, სტივ უანდერის ბექ-ვოკალისტ დეჯა გომესთან. სიმღერის ავტორი რუსა მორჩილაძეა და, შეიძლება ითქვას, ეს მის მიერ შექმნილი ერთ-ერთი საუკეთესო სიმღერაა, რომელიც აუცილებლად გაჰიტდება. სიმღერის არანჟირებას აკეთებს გენიალური მუსიკოსი, წლების განმავლობაში ჯგუფ Earth, Wind and Fire-ის მუსიკალური ხელმძღვანელი მორის ფლეჟერი. მომღერალი თბილისში 2 მარტს ჩამოვიდა, რასაც სპეციალური პრესკონფერენცია მიეძღვნა. სიმღერაზე კლიპის გადაღებაც დაიგეგმა. კომპოზიტორებს შორის ასეთი დონის თანამშრომლობა, შეიძლება ითქვას, პირველად შედგა. ქართველი და ამერიკელი მუსიკოსების ეს კოლაბორაცია ახალ სიმაღლეზე აიყვანს ქართულ შოუ-ბიზნესს და არაერთი ერთობლივი პროექტის პერსპექტივას ჩაუყრის საფუძველს. სიმღერის ტექსტი მეგობრობაზეა. დეჯა გომესთან ერთად ჩამოვიდა მისი პროდიუსერი, გრეგ ქოკლი, რომელიც ამერიკული მუსიკალური ინდუსტრიის ერთ-ერთი გამოცდილი და სერიოზული წარმომადგენელია. ის იყო Earth, Wind and Fire-ისა და სტივ უანდერის ტურ-მენეჯერი, ასევე, არაერთი ვარსკვლავის პროდიუსერი, მათ შორის: აშერის, ჩაკა ჰანის, ზიგი მარლეისა და სხვების. „ბრავო რეკორდსის” დახვეწილი პროფესიონალები კი გვაფიქრებინებენ, რომ დუეტი აუცილებლად ძალიან წარმატებული და ხარისხიანი გამოვა.