სტატისტიკის დეპარტამენტი თავის ოფიციალურ ელექტრონულ გვერდზე გვამცნობს, რომ საქართველოს მოსახლეობის რეალური ოდენობა 4 მილიონ 469 ათას ორასია. თუმცა დემოგრაფები და სტატისტიკის დეპარტამენტის ყოფილი სპეციალისტები ამტკიცებენ, რომ რეალური მოსახლეობის ოდენობა ამაზე გაცილებით ნაკლებია, რადგან ისინი არც ერთი პარამეტრით, ყოველ შემთხვევაში, საქართველოს ტერიტორიაზე არ იძებნებიან. ამის ერთ-ერთი ძირითადი მიზეზია, რომ ჩვენი თანამემამულეების უმეტესობა უცხოეთში არალეგალურად იმყოფება. წესითა და რიგით, მოსახლეობის საყოველთაო აღწერა 2012 წელს (იანვარში) უნდა ჩატარებულიყო, მაგრამ 2014 წლისთვის გადაიდო. რატომ არის გართულებული ჩვენს ქვეყანაში როგორც მოსახლეობის, ისე ამომრჩეველთა ზუსტი რაოდენობის დადგენა, განსაკუთრებით, იმ ფონზე, როდესაც ხელისუფლება ამტკიცებს, რომ ელექტრონულ დემოკრატიაში დიდი გარღვევაა. დემოგრაფიის ინსტიტუტის დირექტორი ავთანდილ სულაბერიძე აგვიხსნის აღწერისა და მოსახლეობის დათვლის თავისებურებებსა და სიძნელეებს.