თავდაპირველად მისი ლექსები სოციალურ ქსელში გამოჩნდა – ლამაზი, სევდიანი, რომანტიკული, არავის მსგავსი და თაყვანისმცემელთა არმიაც ნელ-ნელა შემოიკრიბა... თამუნა ხელაძე თავის გარეგნობას ლექსებში „ფუთავს“ და მომაჯადოებელ ხიბლს ანიჭებს. მისი პირველი კრებულიც ასეთი გამოვიდა... „ხიბლიანი და სულში ჩამწვდომი აღსასრულამდე...“ – ასე ჰქვია წიგნს, რომლის პრეზენტაცია „კინოს სახლში“ გაიმართა და, გარდა საზოგადოებისთვის უაღრესად ქალური პოეზიის გაცნობისა, ერთი სერიოზული „დატვირთვაც“ ჰქონდა: სოციალური ქსელის მეგობრები „ლაივში“ შეახვედრა ერთმანეთს.
ლექსებს, ავტორთან ერთად, მსახიობი მაკა შალიკაშვილი და ნიკო მიქაია კითხულობდნენ, გია ნიკოლაძე („ნიკოლშოუ“) კი სიმღერებით ახმატკბილებდა პოეზიის საღამოდ ქცეულ პრეზენტაციას, რომელიც „კინოს სახლის“ ორგანიზატორების: გიორგი ლილუაშვილისა და ირინა თურქიას თაოსნობით შედგა და დიდი ტორტით, წითელი ვარდებითა და წითელი ღვინით დასრულდა...