„საქართველოს საგადასახადო კოდექსში“  კიდევ ერთი ცვლილება მზადდება, ინიციატორი საქართველოს მთავრობაა, უმრავლესობის განცხადებით, ამ ცვლილებებმა გლეხებს სოფლის მეურნეობის პროდუქციის წარმოებაში საგადასახადო ტვირთი უნდა შეუმსუბუქოს. რეალურად, ცვლილებების მოცულობა, სულ რაღაც, ნახევარი გვერდია. კანონპროექტის თანახმად, „საქართველოს საგადასახადო კოდექსის 168-ე მუხლის მე-4 ნაწილს ემატება „ფ“ და „ქ“ ქვეპუნქტები, რომლის მიხედვითაც საქართველოში წარმოებული სოფლის მეურნეობის პროდუქციის მიწოდება მის სამრეწველო გადამუშავებამდე (სასაქონლო კოდის შეცვლამდე) და, ასევე, საქართველოში წარმოებული მსხვილფეხა რქოსანი პირუტყვის, ღორის, ცხვრისა და თხის ახალი ან გაცივებული ხორცის მიწოდება თავისუფლდება დამატებული ღირებულების გადასახადისგან ჩათვლის უფლებით.“ თემურ კოპალეიშვილი განგვიმარტავს, რით შეუმსუბუქებს ან, საერთოდაც, შეუმსუბუქებს თუ არა გლეხს, იურიდიულ პირს ადგილობრივი სასოფლო-სამეურნეო პროდუქციის წარმოებას „საგადასახადო კოდექსის“ ზემომოყვანილი ცვლილება.