კითხვა: საზარდულში ლიმფური ჯირკვლების გადიდება არის თუ არა შიდსის სიმპტომი?

პასუხი: საზარდულში ლიმფური ჯირკვლების გადიდება შეიძლება ბევრი დაავადების სიმპტომი იყოს, მათ შორის – შიდსის.

კითხვა: რა არის გლუტამინ-ამინოტრანსფერაზა და როდის არის ის მომატებული?

პასუხი: გლუტამინ-ამინოტრანსფერაზა ღვიძლშიდა ქოლესტაზის მაჩვენებელია, რომელიც შეიძლება გაზრდილი იყოს შემდეგი პათოლოგიების დროს: მწვავე და ქრონიკული ჰეპატიტები, ნაღველკენჭოვანი დაავადება, ასევე, ჰეპატო-ბილიარულ სისტემაში ონკოლოგიური პროცესები.

კითხვა: ვარ 32 კვირის ორსული, ვიკვებები ნორმალურად, წონაში კი სულ 3,8 კილოგრამი მაქვს მომატებული. რასთან არის ეს დაკავშირებული და ბავშვზე ხომ არ იმოქმედებს? 

პასუხი: თუ ულტრაბგერითი კვლევების მონაცემებით ნაყოფი ნორმალურად ვითარდება და ანალიზები ნორმაშია, წონის გამო ნუ ინერვიულებთ, მშობიარობის შემდეგ, სხვა ქალებისგან განსხვავებით, ნაკლები პრობლემა გექნებათ.

კითხვა: მაქვს დანამატების ქრონიკული ანთება. შემიძლია თუ არა ჯანმრთელი ბავშვის გაჩენა?

პასუხი: ამის ასპროცენტიან გარანტიას ვერავინ მოგცემთ. დიდია ორსულობის პერიოდში ნაყოფის ინფიცირების რისკი, მაგრამ, ორსულობისათვის ხარისხიანი მომზადების შემთხვევაში, რისკის ხარისხი მნიშვნელოვნად მცირდება. 

კითხვა: 2-3 კვირის ორსულობის ვადაზე გამიკეთდა ფლუოროგრაფია. საშიშია თუ არა ეს ბავშვისთვის?

პასუხი: ორსულობის ადრეულ ვადებზე ფლუოროგრაფია  საკმაოდ ხშირი შემთხვევაა. გამოცდილება აჩვენებს, რომ დეფექტების განვითარების რისკი ამის გამო ძალიან დაბალია. 

კითხვა: ბავშვობიდან ენაზე მაქვს ბევრი ღარი, თუმცა, არ მაწუხებს. მამასაც აქვს, მაგრამ, ჩემსავით ღრმა და დიდი არა. რა არის ეს და საჭიროა თუ არა მკურნალობა?

პასუხი: თუ ეს ღარები უსიამოვნო შეგრძნებებს არ იწვევს, შეიძლება, ენის აგებულების თავისებურებად ჩაითვალოს. მკურნალობას არ საჭიროებს. ამავე დროს, ენის ზედაპირის ცვლილებები (მაგალითად, „გეოგრაფიული ენა“) შეიძლება კუჭ-ნაწლავის ორგანოების დაავადების მაჩვენებელი იყოს. ამ შემთხვევაში საჭიროა კუჭ-ნაწლავის ენდოსკოპიური, ღვიძლის, ნაღვლის ბუშტისა და პანკრეასის ულტრაბგერითი გამოკვლევა.   

კითხვა: მაქვს ნაწლავების დისბაქტერიოზი. შეიძლება თუ არა ნაწლავების სპაზმის დროს თავბრუსხვევა და წნევის მატებაც კი?

პასუხი: როგორც წესი, ნაწლავების სპაზმის დროს არ ხდება არტერიული წნევის მატება და თავბრუსხვევა. სხვა მიზეზი უნდა მოძებნოთ.

რუბრიკას უძღვება ოჯახის ექიმი