კითხვა: მყავს ავტომობილი „ჰონდა ცეერვე”. დაქოქვისას, როგორც კი გასაღებს ხელს გავუშვებ, ის იმ წამსვე ქრება და ხელსაწყოების დაფაზეც შუქი ითიშება. გამოდის, თითქოს გასაღებს პირიქით, უკან ვატრიალებ და ავტომობილს ვაქრობ. რა შეიძლება იყოს ამის მიზეზი და ვის მივმართო შესაკეთებლად?

პასუხი: სავარაუდოდ, გასაღების ბუდის ქვედა, მექანიკური ნაწილი დაზიანდა, სადაც სხვადასხვა სადენი ერთმანეთს კვეთს. თქვენ გჭირდებათ ნებისმიერი ელექტრიკოსი. მისი აღდგენა საკმაოდ იოლია, რადგან თავიდან ბოლომდე იშლება და იწყობა. შიგნით განთავსებული, ეგრეთ წოდებული ცენტრალური ფირფიტის ოდნავი ფორმის შეცვლით, თქვენი პრობლემა მოგვარდება. იმ შემთხვევაში, თუ ის გადახურებულია ან სხვა რაიმე სერიოზული პრობლემა აქვს, მაგალითად, გატეხილია, მაშინ ამ პატარა მექანიზმის შეცვლა მოგიწევთ. მისი შეძენა შესაძლებელი იქნება დაშლილი მანქანების ბაზრობაზე, მით უმეტეს, რომ ეს კონკრეტული მექანიზმი ყველა „ჰონდას” ერთნაირი აქვს. 

კითხვა: მყავს ავტომობილი „ფორდ ფოკუსი”, 2000 წლის, რომელიც ას კილომეტრზე თხუთმეტ ლიტრამდე ბენზინს მოიხმარს. ის აღჭურვილია 2.0 ლიტრი მოცულობის ძრავათი და მართვის ავტომატური კოლოფით. ამ მოდელისთვის ის საკმაოდ ბევრს წვავს და რისი ბრალი შეიძლება იყოს ეს?

პასუხი: კარგი იქნებოდა, უფრო დეტალურად დაგეხასიათებინათ, თუ როდის მოუმატა წვას თქვენმა ავტომობილმა და როდის შეამჩნიეთ ეს. მაგრამ, თუ ზოგადად ვიმსჯელებთ, წვის მატებას იწვევს: დასვრილი ჰაერის ფილტრი, დასვრილი ბენზინის ფილტრი, რომელიმე დაზიანებული სენსორი (მაგალითად, ეგრეთ წოდებული „ლამბდა”), გაჭედილი კატალიზატორი ან მაყუჩი სისტემის რომელიმე მილი, საწვავის ავზში დაბრუნების სისტემის სარქველი (ეგრეთ წოდებული „აბრატნი კლაპანი”) ან უბრალოდ, სისტემაა დასვრილი და გაწმენდასა და რეგულირებას საჭიროებს. ამის გამომწვევი მიზეზი, ასევე, შეიძლება იყოს რომელიმე სანთლის (ეგრეთ წოდებული „სვეჩის”) დაზიანებაც. იმისთვის, რომ უფრო ზუსტად გაიგოთ მიზეზი, მიმართეთ საწვავი სისტემის ხელოსანს.

კითხვა: მყავს ავტომობილი „გოლფ 3”. რამდენიმე დღის წინ მომიწია ტრასაზე გასვლა. საკმაოდ მაღალი სიჩქარით მოვდიოდი და მანქანამ თავისთავად შეანელა სვლა, თითქოს მუხრუჭს დავაჭირე ფეხი. მეორე დღეს ეს არ გამეორებულა, მაგრამ ორ-სამ დღეში პრობლემამ სხვა მხრივ იჩინა თავი. მანქანას ძალიან უჭირს დაქოქვა, ან თუ დაიქოქა, მალევე ქრება. რა შეიძლება, იყოს ამ ყველაფრის მიზეზი?

პასუხი: გირჩევთ, უპირველესად, ბენზინის წნევა შეამოწმოთ. სავარაუდოდ, მას რაიმე ზღუდავს. შესაძლოა, დასვრილია ბენზინის სისტემის რომელიმე განყოფილება, ან თვითონ ბენზინის პომპაც კი. „ფოლკსვაგენის” ამ მოდელებს საწვავის სისტემაში ორი პომპა აქვს. ერთი, რომელიც უშუალოდ საწვავის ავზშია განთავსებული და მეორე, რომელიც მის გარეთაა. თუკი საწვავის დონე თქვენს ავზში ნახევარს გადაცილდა და პრობლემა მოიხსნა, ესე იგი საწვავის ავზში განთავსებული პომპის შეცვლა მოგიწევთ. ის, უბრალოდ, დამხმარე ფუნქციას ასრულებს, რომ, როდესაც ავზში საწვავის დონე ცოტაა, საწვავის ავზის გარეთ, მაღალი წნევის პომპას საწვავი მიაწოდოს.