ანუ ადეკვატურად უბედურები

მართალია, დედაქალაქის მესვეურებმა დაგვაიმედეს, რომ ჩვენს სამშობლოში ყველაზე ოპტიმისტი მოსახლეობაა (ერთი ისაა, რომ კვლევის ჩამტარებელი არ დაუსახელებიათ, თუმცა, არც ის არის გამორიცხული, გუმანით ეგრძნოთ), მაგრამ, საერთაშორისო სააგენტო Gallup-ის მიერ ჩატარებული გამოკითხვით, ყველაზე უბედურ ერებს შორის რუმინელები, ეგვიპტელები და ქართველები ლიდერობენ (თურმე, ეგვიპტესა და საქართველოში ბედნიერების „ნულოვანი ინდექსია“). ყველაზე ბედნიერად კი თავს ფიჯელები, ნიგერიელები, ჰოლანდიელები და შვეიცარიელები გრძნობენ.

სავსებით ბუნებრივია, ბედნიერებაზე თითოეულს განსხვავებული წარმოდგენა აქვს და ისიც, რომ „ყველა უბედური უბედურია თავისებურად“. ისიც ფაქტია, რომ, თუკი შენს ტერიტორიაზე ერთი საერთაშორისოდ აღიარებული და ორი მხოლოდაღიარებული წარმონაქმნია, თავი ბედნიერად არ უნდა იგრძნო. შესაბამისად, თავიც იმით დავიმშვიდოთ, რომ, თუ ბედნიერება გაგვიფრინდა, ადეკვატურობა დაგვბრუნებია, რაც, „ნულოვანი ინდექსის“ პირობებშიც კი, დამაიმედებელი სასტარტო მონაცემია.