თუ მძიმე დღე გქონდათ – ძალიან დაიღალეთ და, თან, უსიამოვნებებიც შეგემთხვათ, ცხადია, საღამო მოშხამული გექნებათ და, შესაბამისად, არც მეორე დღეს იგრძნობთ თავს მხნედ და მხიარულად. მაგრამ, არც კი იფიქროთ წამლების დალევა, გაცილებით ეფექტურია, სიმხნევესა და ხალისის დასაბრუნებლად ყველაზე მარტივი და, ამავე დროს, სასიამოვნო ხერხი გამოიყენოთ – გაიცინეთ. დიახ, გაიცინეთ და რაც შეიძლება ხმამაღლა. შეიძლება, სულაც არ გეცინებათ, მაგრამ, თავს ძალა დაატანეთ: ჩაიხედეთ სარკეში, „აღმოაჩინეთ“, რომ იქიდან მშვენიერი ქალი გიყურებთ, გაეკეკლუცეთ საკუთარ თავს და გაიღიმეთ მაინც. ღიმილს კი სიცილიც მიაყოლეთ.

დაიწყეთ თავის მოწესრიგება: გაიკეთეთ ცოტა თამამი მაკიაჟი, ჩაიცვით ის ტანსაცმელი, რომელიც, თქვენი აზრით, ყველაზე მეტად გიხდებათ (არა უშავს, თუ ოდნავ გამომწვევ სტილზე შეაჩერებთ არჩევანს). 

გაიხსენეთ რომელიმე მხიარული მელოდია და წაიღიღინეთ – ასე ნამდვილად დაეხმარებით საკუთარ თავს, შეძლებთ დაივიწყოთ დაღლილობა და უსიამოვნება და მხიარულებისთვის განეწყოთ.

ჩაის ან ყავის დალევისას გაიხსენეთ ყველაზე სასიამოვნო და სასაცილო ეპიზოდები თუნდაც თქვენი შორეული წარსულიდან და საკუთარ ღირსებებში დარწმუნებული გაემართეთ სამსახურისკენ.

თამამად გამოავლინეთ იუმორის გრძნობა – გაეხუმრეთ თანამშრომლებს (ცხადია, არა უტაქტოდ) და, თუ მათგანაც საპასუხო იუმორი მიიღეთ, გაიცინეთ ხმამაღლა, მთელი გულით.

ყურადღება არ მიაქციოთ ვინმეს მიერ ნათქვამ საწყენ სიტყვებს – ესეც იუმორში გაატარეთ; არ აჰყვეთ პროვოკაციებს და მოსაგერიებელ იარაღად თქვენი მომხიბლავი ღიმილი გამოიყენეთ.

თუ დღის განმავლობაში ბოლომდე მაინც არ გამოგისწორდათ განწყობა, გადადეთ ყველა საქმე და წადით იმ მეგობართან (ან მეგობრებთან), რომლის საზოგადოებაშიც ყველაზე მშვიდად და ლაღად გრძნობთ თავს.

თქვენი მატერიალური მდგომარეობიდან გამომდინარე, განსაზღვრეთ, რა გაუთვალისწინებელ ხარჯს გაუძლებს თქვენი ჯიბე და გაიკეთეთ პატარა საჩუქარი – იყიდეთ, ვთქვათ, ლამაზი ბიჟუტერიის სამკაული, ან, სულაც, ის სუნამო, რომელზეც დიდი ხანია, ოცნებობთ.

საღამოს, ძილის წინ, უყურეთ რამე კარგ კინოკომედიას და იცინეთ მთელი ძალით, თუნდაც თქვენი ოჯახის წევრებს უკვე ეძინოთ, ან მოძებნეთ ინტერნეტში ანეკდოტების გვერდი და თქვენი მოსაწონი ყველა ანეკდოტი ხმამაღლა წაიკითხეთ, რომ ოჯახის წევრებიც (ცხადია, ვისაც ღვიძავს) აიყოლიოთ სიცილში და კიდევ უფრო გახალისდეთ.

თუ ჩვენს რჩევებს გაითვალისწინებთ და ყოველდღიურად ნაწილობრივ მაინც შეასრულებთ მათ, გვერწმუნეთ, გარდა იმისა, რომ ძალიან დიდი ხნით დაემშვიდობებით ნევროზსა და უგუნებობას, თავსაც უფრო მხნედ, ენერგიულად და ხალისიანად იგრძნობთ, შედეგად კი ძალიან მალე გახდებით საზოგადოების სული და გული – ღიმილიან და ლაღ ადამიანთან ურთიერთობა ყველას უხარია.