ქართულ სივრცეში კარგად ცნობილი და წარმატებული ქართულ-სომხური მუსიკალური პროექტის – „10+10-ის“ მონაწილეებს „საზოგადოებრივმა მაუწყებელმა“ სასიამოვნო სურპრიზი მოუმზადა – ქართველი და სომეხი მომღერლები ეგვიპტის ფეშენებელურ კურორტ შარმ-ელ-შეიხში ერთად ისვენებენ და შესანიშნავ დროს ატარებენ. მაშინ, როცა თბილისში საკმაოდ ცივა და თოვს, პოპ- შემსრულებლები მსოფლიოს ერთ-ერთი ყველაზე ცნობილი კურორტის პლაჟზე ირუჯებიან და ერთობიან. დამეთანხმებით, თბილისურ ზამთარს ყველა სიამოვნებით გაექცეოდა ასეთ ეგზოტიკურ ქვეყანაში. რამდენიმე გამონაკლისის გარდა, პროექტის ყველა მონაწილე ამჟამად ეგვიპტეში იმყოფება. ნინი შერმადინმა ეგვიპტეში წასვლა იმიტომ  ვერ მოახერხა, რომ შტატებში მიემგზავრება. სარწმუნო ინფორმაციით, მომღერლები დასვენებით ძალზე კმაყოფილნი არიან. იმედია, 10-დღიანი სასიამოვნო დასვენების შემდეგ ახალი ენერგიით დაბრუნდებიან სამშობლოში და კიდევ უფრო საინტერესო სიმღერებს შემოგვთავაზებენ.