სახლი არა მარტო ჩვენი საცხოვრებელი, არამედ, ერთგვარი წინასწარმეტყველური მინიშნებების საშუალებაცაა. მინიშნებები კი ძალიან მნიშვნელოვანი და საყურადღებოა. არსებობს ისეთი ატრიბუტიკა, რომელიც ბინაში აუცილებლად უნდა გქონდეთ, რათა თქვენი ცხოვრება უფრო მეტად ნაყოფიერი, წარმატებული და იღბლიანი გახადოთ. მაგალითად: ჩინური დრაკონი ქმნის ისეთ კოსმიურ ენერგიებს, რომლებსაც ჩვენს ოჯახსა და სამსახურში წარმატება მოაქვს. დრაკონისა და მოძრავი წყლის ერთობლიობა კი კიდევ უფრო აძლიერებს ენერგიების შემოდინებას, რომელიც წარმატებების მიღწევაში გვეხმარება. ასეთი მოძრავი წყლის მოწყობილობები ბაზრობაზე ან ჩინურ მაღაზიებში შეგიძლიათ, შეიძინოთ. თუ მას ოთახის ჩრდილოეთ ნაწილში დადგამთ, კარიერულ წინსვლაში შეგეწყობათ ხელი, ხოლო, თუ მატერიალური კეთილდღეობის მიღწევა გინდათ, მაშინ ასეთი ატრიბუტიკა, ჯობია, სამხრეთ-აღმოსავლეთით მოათავსოთ.

კრისტალური ბურთულა ერთ-ერთი მძლავრი აქტივიზატორი და წარმატებების მომტანი ატრიბუტია შემოქმედებითი ადამიანებისთვის. თუ კომუნიკაციის სფეროში გიჭირთ, ვერ ახერხებთ თანამოაზრეების დაჯერებას  თქვენი აზრების სისწორეში და გიჭირთ საერთო ენის გამონახვა კოლეგებთან, შეიძინეთ კრისტალური ბურთულა და დადეთ თქვენს სამუშაო მაგიდაზე. ის, გარდა წარმატებებისა, სიმდიდრესაც გპირდებათ და თქვენი ავტორიტეტიც საგრძნობლად ამაღლდება.

თუ მიუხედავად დიდი ძალისხმევისა, კარიერაში არ გიმართლებთ, მაშინ სასწრაფოდ შეიძინეთ თევზებიანი აკვარიუმი, მაგრამ, გაითვალისწინეთ, რომ აკვარიუმი სასტუმრო ოთახის ჩრდილოეთ ნაწილში უნდა დადგათ, მასში კი რვა ოქროსფერი და ერთი ვერცხლისფერი თევზი უნდა დაცურავდეს. სამუშაო მაგიდაზე კი თევზის ფორმის სტატუეტი დადგით. ეს სიმდიდრისა და ავტორიტეტის მოხვეჭაში შეგიწყობთ ხელს.

ეგრეთ წოდებული ამეთვისტოს ხე ძლიერი სტიმულატორია კოლეგებთან და საქმიან პარტნიორებთან საერთო ენის გამონახვისა და ერთობლივი ნაყოფიერი სამუშაოს წარმოებისთვის. შეიძინეთ და დადგით სამუშაო მაგიდაზე ამეთვისტოს ხე და დარწმუნებული იყავით, რომ პროფესიულ საქმიანობაში წარმატებებს ადვილად მიაღწევთ, ასცდებით უთანხმოებებსა და გაუგებრობებს კარიერაში.

ფაიფურის ან თიხისგან დამზადებული გომბეშოს გამოსახულება დადეთ შემოსასვლელი კარის მარცხნივ. ის დაგიცავთ ბოროტი ადამიანების უარყოფითი ენერგიების ზემოქმედებისგან და ბინაში არ შემოუშვებს ნეგატიურ ძალებს. 

საფულეში ატარეთ წითელი ძაფით შეკრული სამი ჩინური მონეტა, რომ თქვენს ბიზნესში ხელი მოგემართოთ და პრობლემები არ შეგექმნათ. ეს მონეტები ჩინურ მაღაზიაში შეიძინეთ. ასევე, შეგიძლიათ, ისინი დაკიდოთ მაღაზიის შესასვლელ კარზე, რომ თქვენს ბიზნესს საფრთხე არ შეექმნას და ბევრი კლიენტი მიიზიდოთ. 

კუ-დრაკონის გამოსახულება მეტ გამბედაობასა და სითამამეს შეგმატებთ. თქვენს სამუშაო მაგიდაზე დადგით მისი გამოსახულებიანი სტატუეტი და ჩათვალეთ, რომ კოლეგები და ხელმძღვანელობა თქვენს სამუშაოს წუნს ვერ დაუდებენ. ის დაგეხმარებათ, თქვენი შრომა დამსახურებულად დაფასდეს და, შესაბამისად, ეს მატერიალურადაც დადებითად აისახოს თქვენს შემოსავალზე.

მითიური ჩინური მარტორქა, რომელიც ცხენი-დრაკონის სახელითაა ცნობილი, იზიდავს კოსმოსიდან  კოსმიურ დადებით ენერგიებს და წარმატება მოაქვს პოლიტიკასა და სამხედრო სფეროში მომუშავე ადამიანებისთვის. ის განსაკუთრებულად კარგია აქტიური და საკუთარ ძალებში დარწმუნებული ადამიანებისთვის. 

მამალი, რომელსაც ფერადი ბიბილო აქვს და ფაიფურისგანაა დამზადებული, დაგიცავთ ინტრიგებისა და ფარული მტრების შემოტევებისგან. დადგით ის ოფისში ან სახლში ისეთ ადგილას, რომ ადვილად დასანახი და თვალშისაცემი იყოს. ეს სტატუეტი თქვენს კეთილდღეობაზე აგებს პასუხს. შეიძინეთ ის და ნახავთ,  როგორ დაიწყებს სიტუაცია ყოველდღიურად, ნელ-ნელა გამოსწორებას. 

ზოგადად, საცხოვრებელი და სამუშაო გარემოს დაკვირვება ბევრ რამეზე მიგანიშნებთ. მაგალითად, თუ იატაკი უმიზეზოდ აიყარა, დროზე ადრე გაფუჭდა, ამოიბურცა და სიარულის დროს ჭრიალი ისმის, ეს იმის მანიშნებელია, რომ თქვენ არასწორი წესით ცხოვრობთ და რაღაც უნდა შეცვალოთ. ანუ, იატაკი გკარნახობთ, რომ ცხოვრებაში რადიკალური ცვლილებებით გამოასწოროთ შექმნილი სიტუაცია.