„კრისტის“ აუქციონზე 6,6 მილიონ დოლარად გაიყიდა 32,77 კარატის წონის უიშვიათესი ყვითელი ბრილიანტი. 

მსხლის ფორმის ბრილიანტის თავდაპირველი ფასი 6-8 მილიონ დოლარს შეადგენდა. ამერიკის გეოლოგიური ინსტიტუტის ექსპერტები აღნიშნავენ, რომ ქვები ასეთი გაჯერებული და ღრმა ფერით განსაკუთრებით იშვიათია: 10 მილიონ შემთხვევაზე – მხოლოდ ერთი. ყვითელი ფერი კრისტალურ მესერში აზოტის მოხვედრის გამო მიიღება.

„კრისტის“ შემოდგომის სეზონის პირველ აუქციონზე წარმოდგენილი იყო 300-ზე მეტი საიუველირო ნაწარმი და ძვირფასი ქვები. ვაჭრობის მომწყობებმა საერთო ჯამში 46 მილიონი დოლარი ამოიღეს.

აუქციონზე წარმოდგენილი იყო ისეთი ცნობილი ფირმების სამკაულები, როგორებიცაა: „ტიფანი“, „გრაფი“, „კარტიე“. განსაკუთრებული ყურადღება მიიპყრო „არ-დეკოს“ სტილში შესრულებულმა ბრილიანტებით შემკულმა „კარტიეს“ საიუველირო სახლის ნამუშევარმა, სერიიდან „ტუტი-ფრუტი“, რომელიც ზურმუხტით, ლალითა და საფირონით იყო დამშვენებული. ის 962 ათას დოლარად გაიყიდა.

აუქციონზე წარმოდგენილი იყო, აგრეთვე, ბრილიანტისთვლებიანი ბეჭდების კოლექცია, ფერადი ბრილიანტებით დამშვენებული სამკაულები –  საყურეები, მძივებად ასხმული ბრილიანტები.

ტრადიციის მიხედვით, ოქტომბრის საიუველირო ვაჭრობა ნიუ-იორკში ხსნის შემოდგომის სეზონს. შემდგომი აუქციონები ჩატარდება ჟენევაში, პარიზში, ლონდონსა და ჰონკონგში.