კითხვა: როგორ მოვიქცეთ საკვებით მოწამვლის დროს? ბავშვი 3 წლის არის.

პასუხი: გამოურეცხეთ კუჭი – შეეცადეთ, დაალევინეთ 1,5-2 ლიტრი ანადუღარი წყალი, ან, რამდენსაც დალევს, შემდეგ აუცილებლად ღებინება უნდა გამოიწვიოთ. ამის შემდეგ მიეცით აქტივირებული ნახშირი: 3 წლის ბავშვს – 3 აბი (თითო აბი ბავშვის ასაკის თითო წელზე).

კითხვა: თირკმლის რა დაავადებებმა შეიძლება გამოიწვიოს პარკუჭოვანი ექსტრასისტოლია, თუ გული და სისხლძარღვოვანი სისტემა გამოკვლეულია და დარღვევები არ მაქვს?

პასუხი: პარკუჭოვანი ექსტრასისტოლია არის მოვლენა, რომელიც იონური ცვლის დარღვევების დროს ვითარდება. შესაბამისად, ეს შეიძლება მოხდეს თირკმლის უკმარისობის დროს, რომელიც გამოწვეულია თირკმელების  გლომერულური სისტემის ცვლილებებით – მწვავე მოწამვლა, გლომერულონეფრიტი და სხვა.

კითხვა: რა სხვაობა უნდა იყოს სისტოლურ და დიასტოლურ წნევებს შორის, მოსვენების მდგომარეობაში?

პასუხი: ნორმაში ეს სხვაობა (მას პულსური წნევა ეწოდება) უნდა შეადგენდეს 34-45 მილიმეტრს. თუ დატვირთვის დროს პულსური წნევა მცირდება, ეს მეტყველებს გულსა და სისხლძარღვებს შორის ბალანსის დარღვევაზე. დაბალწნევიან ქალბატონებს ეს სხვაობა შეიძლება ნაკლები ჰქონდეთ (25 მილიმეტრზე ნაკლები მაინც არ უნდა იყოს).

კითხვა: ბოლო დროს მკვეთრად ადგომისას ძლიერი თავბრუხვევა მაქვს. იქნებ, ეს დაბალი ჰემოგლობინის ან დაბალი წნევის ბრალია?

პასუხი: ეს არ უნდა იყოს ჰემოგლობინის ბრალი. ასეთი მოვლენები შესაძლებელია, როდესაც ჰემოგლობინი 80-85-ზე ნაკლებია. უფრო მოსალოდნელია, რომ ეს დაკავშირებულია ადგომის მომენტში მკვეთრ და მოკლევადიან წნევის ვარდნასთან ტვინის სისხლძარღვებში (ეგრეთ წოდებული „ორთოსტატიული ჰიპოტენზია“). ეს, შეიძლება, მოხდეს შემდეგი პათოლოგიების დროს: ვეგეტოსისხლძარღვოვანი დისტონია, არითმიის ზოგიერთი ფორმა, კისრის მალების ოსტეოქონდროზი და სხვა.

კითხვა: ხანდაზმულ ქალბატონს თავში გამუდმებით აქვს შუილი, რაც ძალიან მოქმედებს მის ნერვებზე. რით შეიძლება დახმარება?

პასუხი: ხანდაზმულებს ასეთ შემთხვევაში ყველაზე მეტად შველით პრეპარატები, რომლებიც თავის ტვინში სისხლის მიმოქცევასა და ნივთიერებათა ცვლას აუმჯობესებს, რადგან, უფრო ხშირად, ასეთი სიმპტომები თავის ტვინის სისხლძარღვების ათეროსკლეროზით არის გამოწვეული.