ელენ დე ჯენერისის შოუ დიდი პოპულარობით სარგებლობს ამერიკაში და სპეციალურად ამ გადაცემისთვის ფეხბურთელმა დევიდ ბექჰემმა მონაწილეობა მიიღო სახალისო სიუჟეტში. გადაცმული ვარსკვლავი საკუთარი წარმოების პარფიუმის გაყიდვას ცდილობდა სავაჭრო ცენტრში. ბექჰემს სპეციალური უნიფორმა, სათვალე და კეპი ეხურა და მისი ცნობა მხოლოდ ერთმა მომხმარებელმა მოახერხა. „ლოს-ანჯელეს გელექსის” ვარსკვლავი თავს ავსტრალიელ რიკიდ ასაღებდა და ცდილობდა, სუნამო „დევიდ ბექჰემი” გაეყიდა, თუმცა, დღემ ისე ჩაიარა, ვერც ერთი ფლაკონის გაყიდვა ვერ მოახერხა. ვაჭრობაში ბექჰემს არ გაუმართლა, სამაგიეროდ, საფეხბურთო ამბებში უმართლებს – მისმა ამჟამინდელმა კლუბმა კონტრაქტის გახანგრძლივება შესთავაზა. გარდა ამისა ბექჰემის თავიანთ კლუბებში მიწვევა „ტოტენჰემის”, „ქუინზ პარკ რეინჯერსისა” და „პარი სენ ჟერმენის” ხელმძღვანელობასაც სურს.