რუდ ვან ნისტელროიმ, კლარენს ზეედორფმა, პატრიკ ვიეირამ და ჯან-ლუიჯი ბუფონმა კომპანია „ჰეინეკენის” ახალი სარეკლამო რგოლის გადაღებაში მიიღეს მონაწილეობა, რომელიც ჩემპიონთა ლიგის ახალი სეზონის დაწყებას მიეძღვნა. რეკლამა ორი სერიისგან შედგება. პირველში, რომელსაც „პანთეონი” ეწოდება ვიეირა და ვან ნისტელროი გლადიატორების როლში გვევლინებიან და რომაულ პანთეონში ბურთისთვის იბრძვიან. მეორე რგოლში კი, სახელწოდებით „ოპერა”, კლარენს ზეედორფი ოპერის სცენიდან კარის მიმართულებით პენალტის დასარტყმელად ემზადება, კარებში კი, მსოფლიოს ჩემპიონი ჯან-ლუიჯი ბუფონი დგას. დარტყმის განხორციელებამდე ზეედორფს ანგელოზები ურჩევენ, თუ რომელ მხარეს დაარტყას. აღსანიშნავია, რომ კომპანია „ჰეინეკენი” ჩემპიონთა ლიგის ოფიციალური სპონსორია 1994 წლიდან.