27 სექტემბერს ესპანეთში ანა ბაგრატიონ-გრუზინსკისა და დავით ბაგრატიონ-მუხრანელის სამეფო ოჯახში პატარა ვაჟი – გიორგი დაიბადა. როგორც ანას მამამ და პატარა გიორგის ბაბუამ, ნუგზარ ბაგრატიონ-გრუზინსკიმ ჩემთან საუბრისას განაცხადა: დედა და შვილი თავს კარგად გრძნობენ და გარკვეული დროის შემდეგ თბილისში ჩამოსვლას გეგმავენ. დავით ბაგრატიონ-მუხრანელმა და ანა ბაგრატიონ-გრუზინსკიმ 2009 წლის 8 თებერვალს, დავით აღმაშენებლის ხსენების დღეს სამების საკათედრო ტაძარში საქართველოს კათოლიკოს-პატრიარქის, ილია მეორის კურთხევით დაიწერეს ჯვარი. წყვილი ბოლო დროს ესპანეთში ცხოვრობდა და სწორედ იქ დაიბადა სამეფო ოჯახის ტახტის მემკვიდრე.

ნუგზარ ბაგრატიონ-გრუზინსკი (ანა ბაგრატიონ-გრუზინსკის მამა): გიორგი ესპანეთში 27 სექტემბრის ღამეს დაიბადა. ჩვენთან, საქართველოში, იმ დროს უკვე 28 სექტემბერი იყო, ამიტომ, ცოტა დავიბენი – არ ვიცი, მომავალში როდის გადავუხადო დაბადების დღე (ეს ხუმრობით). ძალიან გახარებული ვარ, მანამდეც მყავდა ბიჭი შვილიშვილი – თემურ ჭიჭინაძე, ახლა უკვე გიორგიც მყავს.

– ანა მშობიარობამდე ესპანეთში ცხოვრობდა? როგორ მიმდინარეობდა მისი ორსულობა?

– დიახ, ესპანეთში ცხოვრობდა მეუღლესთან ერთად. ყველაფერი კარგად, ნორმის ფარგლებში მიმდინარეობდა.

– როგორ ჩაიარა მშობიარობამ?

– ყველაფერმა ძალიან კარგად ჩაიარა. ანამ ფიზიოლოგიურად იმშობიარა, ყოველგვარი გართულების გარეშე. მშობიარობამდე ორი საათით ადრე ვესაუბრეთ. რომ დაგვირეკა და გვითხრა, ვიმშობიარეო, არ გვჯეროდა, იმდენად მოულოდნელი იყო.

– მამა დაესწრო მშობიარობას?

– მამა არ დასწრებია მშობიარობას, მაგრამ ბავშვი მაშინვე ნახა. ანამ რომ დაგვირეკა,  გვითხრა, რომ სანამ თვითონ ნახავდა შვილს, მანამდე დავითმა ნახა, ძალიან ბედნიერია და გვერდიდან არ შორდებაო.

– რამდენი კილოგრამი დაიბადა გიორგი?

– 3 კილოგრამი და 300 გრამი დაიბადა, სიგრძეში – 50 სანტიმეტრი.

– ვინ დაესწრო მშობიარობას?

– ანას ბებია, ანუ დედაჩემი. 86 წლის ქალი ჩავიდა ესპანეთში ანას გასამხნევებლად. თვითონ გადაწყვიტა გამგზავრება, უნდოდა, ანას გვერდით ყოფილიყო.

– კიდევ ვინ იყვნენ ანას გვერდით?

– ანას ქალიშვილები, რომლებიც  დიდი ხანია, დედასთან ერთად ცხოვრობენ ესპანეთში. მათ ჯერ ბოლომდე არ აქვთ ძმის დაბადება გაცნობიერებული, მაგრამ, ძალიან გახარებულები არიან.

– ვინ შეარჩია ბავშვისთვის სახელი?

– ბევრ ჩვენს წინაპარს ერქვა გიორგი, როგორც ჩემი ხაზით, ასევე, დავითის შტოშიც. შესაბამისად, ლოგიკურია, რომ ბავშვს გიორგი დაარქვეს.

– არ ჩამოვლენ საქართველოში?

– დღეს, წესით, ანა უკვე სახლში იქნება (ინტერვიუ ჩაწერილია 29 სექტემბერს, – ავტორი). ცოტა ხანს კიდევ გაჩერდებიან ესპანეთში და შემდეგ აუცილებლად ჩამოვლენ თბილისში.

– როდის აპირებენ პატარა გიორგის მონათვლას?

– ეს საკითხი ახლო მომავალში გადაწყდება. მე უკვე ვესაუბრე მეუფეს და პატრიარქთან ერთად მიიღებენ გადაწყვეტილებას.

– როგორ წარმოგიდგენიათ პატარა გიორგის მომავალი? მას უკვე დიდი პასუხისმგებლობა დააკისრეს.

– ამ საკითხთან დაკავშირებით ბევრს საუბრობენ, ბევრი მითქმა-მოთქმაა. რამის თქმა ჯერ ადრეა, გიორგი პატარაა. რაც მთავარია, მისი სახით კიდევ ერთი ქართველი დაიბადა.

– ალბათ, უკვე აღნიშნეთ შვილიშვილის დაბადება.

– დიახ, გუშინ აღვნიშნე და დღესაც ვაპირებ აღნიშვნას.

ჟურნალი „თბილისელები“ ულოცავს სამეფო ოჯახს პატარა გიორგის დაბადებას და ჯანმრთელობას და დიდხანს სიცოცხლეს უსურვებს!