ვარჯიშები მუცლის პრესის გასამაგრებლად
შეიძლება, ქალი გამხდარი იყოს, მუცელი კი მაინც გამოწეული ან მოშვებული ჰქონდეს, რაც მუცლის პრესის მოდუნების შედეგია. მაგრამ, ეს ნუ შეგაშფოთებთ – ამ პრობლემას თავადვე მოერევით, თუ თქვენი ცხოვრების წესად აქცევთ იმ ვარჯიშების შესრულებას, რომლებსაც დღეს შემოგთავაზებთ.
ვარჯიშების შესრულება აუცილებელია დილით და საღამოს – დაწოლამდე ორი საათით ადრე. დღის განმავლობაში კი, როცა თუნდაც თავისუფალ 10-15 წუთს მოიგდებთ ხელში, სასურველია, ერთი-ორი ვარჯიში მაინც შეასრულოთ (ზოგიერთის შესრულება სამსახურშიც კი შეგიძლიათ, შესვენების დროს) – ეს უფრო მალე მიგიყვანთ სასურველ შედეგამდე.
1) დადგით სკამი საწოლთან (საზურგე მარცხნივ მოაქციეთ) ისე, რომ გაშლილი ფეხები, ტერფები გამოსდოთ საწოლის გვერდითა კედელს. დაჯექით სკამზე და მაქსიმალურად გადაიზნიქეთ უკან (შეგიძლიათ, სკამის საზურგეს ცალი ხელით მოეჭიდოთ). ცოტა ხანს შეყოვნდით და მერე, ნელ-ნელა მიიღეთ საწყისი მდგომარეობა.
პირველ დღეს ვარჯიში შეასრულეთ 10-ჯერ, ყოველ მომდევნო ჯერზე კი 5-5-ით მოუმატეთ.
2) დაწექით ხალიჩაზე ან მაგარზედაპირიან ტახტზე. ფეხებით გააკეთეთ მახვილი კუთხე და ნახევარი წუთით მაინც გაჩერდით ამ პოზაში. შემდეგ შეასრულეთ „მაკრატელას” მოძრაობა.
ვარჯიშის რაოდენობა – იგივე.
3) დადექით კედელთან ისე, რომ ქუსლებით დაწყებული, ბეჭებითა და თავით დამთავრებული, კედელზე იყოთ აკრული. ტერფებით მთლიანად უნდა იდგეთ იატაკზე (ფეხის წვერებზე არ უნდა აიწიოთ).
ასწიეთ ორივე ხელი ზემოთ ისე, რომ ხელებითაც აეკრათ კედელზე და სხეული მაქსიმალურად „გაწელეთ,” თან ღრმად შეისუნთქეთ. ამ პოზაში გაჩერდით 1 წუთის განმავლობაში, ისუნთქეთ რაც შეიძლება ღრმად. შემდეგ დაუბრუნდით საწყის მდგომარეობას.
ეს ვარჯიში პირველ ჯერზე შეასრულეთ 5-ჯერ, შემდეგ კი 5-5-ით უმატეთ.
4) დაწექით იატაკზე ან მაგარზედაპირიან ტახტზე და მაქსიმალურად ნელა, ჰაერში შეასრულეთ ველოსიპედის მოძრაობა – ჯერ იმის იმიტაციით, თითქოს ველოსიპედი წინ მიგყავთ (20-20 ბრუნი), შემდეგ კი, ამდენივე ბრუნით, უკუსვლის იმიტაცია გააკეთეთ.
გაიმეორეთ 5-ჯერ.
5) დაწექით მუცელზე (ზედაპირი კვლავ მაგარი უნდა იყოს) და ერთდროულად ასწიეთ (უკანა მიმართულებით) ხელები და ფეხები. თავიდან გაგიჭირდებათ, მაგრამ, შეეცადეთ, ფეხები მუხლებიანად ასწიოთ, რომ „ნავი” გააკეთოთ.
გაიმეორეთ 5-ჯერ.
გისურვებთ წარმატებას!