15, 16, 17 სექტემბერს, უშანგი ჩხეიძის სახელობის ზესტაფონის სახელმწიფო დრამატულ თეატრში სრული ანშლაგით ჩატარდა სპექტაკლ „ოპუსი-115-ის” საპრემიერო ჩვენებები. ალექსი ჯაყელის რეჟისორობით სპექტაკლი მოლიერის „დონ ჟუანისა” და „ტარტიუფის” მიხედვით დაიდგა. ალექსი ჯაყელი წლების განმავლობაში ცხოვრობს საფრანგეთში და ქალაქ ლა ბოლში მის მიერვე დაარსებულ თეატრალურ კომპანიას – „პრესტო-ანდანტეს” ხელმძღვანელობს. ზესტაფონის თეატრში რეჟისორი ოთხ ახალ სპექტაკლს დადგამს, პარალელურად კი, ოქტომბრის ბოლოს, ალექსი ჯაყელის მიერ საფრანგეთში, შექსპირის „მაკბეტის” მიხედვით გაცოცხლებული სპექტაკლის – „მინდას“ ნახვის საშუალება მიეცემა მაყურებელს. „ოპუსი-115-ში” მონაწილეობენ როგორც ადგილობრივი, ისე მოწვეული მსახიობები. ასე რომ, უახლოესი ორი თვე თეატრი პრემიერებით იქნება დატვირთული.