ქალის სხეულის ერთ-ერთი მთავარი და მნიშვნელოვანი „უბანი” – მკერდია. ალბათ, დამეთანხმებით, რომ მკვრივი მკერდი ყველა ქალის ოცნებაა, მოდუნებული და მოშვებული კი, გარდა იმისა, რომ სხეულს აუშნოებს, საკმაო დისკომფორტსაც ქმნის. მართალია, ახალგაზრდა ქალბატონებს ეს პრობლემა შედარებით ნაკლებად აწუხებთ, მაგრამ, ჩვენ მიერ შემოთავაზებული ვარჯიშებით არა მარტო დაუბრუნებთ მკერდს სიმკვრივეს, არამედ მომავალშიც დაიზღვევთ თავს ამ პრობლემისგან, ანუ, ეს ოთხი ვარჯიში საუკეთესო პროფილაქტიკური საშუალებაა. გარწმუნებთ, თუ აღიჭურვებით ნებისყოფით, ამ პრობლემასაც მოევლება. მკერდის გასამკვრივებლად არსებობს სპეციალური ვარჯიშები. მართალია, პირველივე ვარჯიშის შემდეგ სასურველ შედეგს ვერ მიიღებთ, მაგრამ ერთ თვეში (თუ რა თქმა უნდა, ყოველდღე, დილა-საღამოს ივარჯიშებთ) შედეგი ნამდვილად გექნებათ.
ვარჯიში პირველი: აიღეთ ორ-ორ კილოგრამიანი ჰანტელები, დაიჭირეთ ორივე ხელში და დადექით სწორად. ჰანტელები ნელ-ნელა ასწიეთ მკერდის გასწვრივ (გაშლილი ხელებით) და გააჩერეთ 1 წუთით. შემდეგ ისევ ნელი მოძრაობით გაშალეთ მკვლავები მხრების სიგანეზე და ისევ 1 წუთით გააჩერეთ. მერე შეეცადეთ, მკლავები მაქსიმალურად გასწიოთ ზურგსუკან და კვლავ 1 წუთით შეაჩერეთ. ბოლოს ხელები ჩამოუშვით და შეისვენეთ. ვარჯიში თავიდან გააკეთეთ 5-6-ჯერ და ყოველ შემდეგ ჯერზე აორმაგეთ.
ვარჯიში მეორე: დაწექით ვიწრო ტახტზე, აიღეთ ჰანტელები და ნელი მოძრაობით ასწიეთ მკერდის გასწვრივ, 1 წუთით შეაჩერეთ და ისევ ნელ-ნელა, მაქსიმალურად გადაშალეთ მკლავები აქეთ-იქით (იატაკისკენ). ერთწუთიანი შეჩერების შემდეგ კვლავ მკერდის გასწვრივ ასწიეთ ხელები და ასე გაიმეორეთ 8-10-ჯერ. ყოველ შემდეგ ვარჯიშზე რაოდენობა გააორმაგეთ.
ვარჯიში მესამე: დადექით სწორად. ჰანტელები ჯერ ერთდროულად ასწიეთ მკერდის გასწვრივ, შეაჩერეთ, მერე თავს ზემოთ „შეჩერდით,” შემდეგ – ისევ მკერდის გასწვრივ და მცირეოდენი პაუზის მერე დაუბრუნდით საწყის მდგომარეობას.
ვარჯიში მეოთხე: ჰანტელიანი მარჯვენა ხელი ასწიეთ თავის ზემოთ, მარცხენა კი მაქსიმალურად გაწიეთ ზურგს უკან. შემდეგ ხელები შეანაცვლეთ (ხელები სინქრონულად უნდა ამოძრაოთ). ვარჯიში შეასრულეთ 15-20-ჯერ.
გახსოვდეთ, რომ, ოთხივე ვარჯიშის დროს, რაც უფრო ნელი იქნება ხელების მოძრაობა, მით უკეთესი და სწრაფი იქნება შედეგიც.