სექტემბერში ახალ ზელანდიაში რაგბის მსოფლიოს ჩემპიონატი დაიწყება და ამ მნიშვნელოვან სპორტულ მოვლენასთან დაკავშირებით, ზელანდიაში სხვადასხვა ღონისძიებები იმართება, რაც რაგბის პოპულარიზებისა და მშობლიური ნაკრების მხარდაჭერის საქმეს ემსახურება. ერთ-ერთი ასეთი მხარდამჭერი აქცია ქალაქ დანიდინში გაიმართა, რომლის დროსაც ადგილობრივმა სტუდენტებმა ამხანაგური მატჩი ჩაატარეს და ამით გამოხატეს მხარდაჭერა „ოლ ბლექსისადმი“. მატჩი გამორჩეული არაფრით იქნებოდა, რომ არა ერთი საინტერესო ფაქტი – მისი ყველა მონაწილე სრულიად შიშველი იყო. შიშველმა რაგბისტებმა ახალი ზელანდიის აბორიგენი ტომის – მაორის საბრძოლო შეძახილი, განთქმული ჰაკაც კი შეასრულეს. საინტერესოა, რომ მატჩს ბრმა არბიტრი ემსახურებოდა, ხოლო გამარჯვება ნომინალურ მასპინძლებს ხვდა წილად.