კითხვა: მამაკაცი დაბადებულია 1954 წლის 23 ნოემბერს, ქალი კი – 1972 წლის 17 აპრილს. მიზანშეწონილია თუ არა მათი ქორწინება ასტროლოგიური კუთხით?
პასუხი: დასავლური ზოდიაქოს ნიშნების შეხამებით, ჩვენ ვხვდებით ორ მონათესავე ნიშანს, ანუ, ერთი მშვილდოსანია, მეორე კი – ვერძი. ამიტომ, მათ ბევრი მსგავსი თვისება აქვთ. ამ კუთხით თუ შევხედავთ, მათი ქორწინება მისაღებია და დამოკიდებულებაც ჰარმონიული ექნებათ. რაც შეეხება აღმოსავლური კალენდრის ზოდიაქოს ნიშნების შეხამებას, ისინი ცხენისა და ვირთხის წელიწადში არიან დაბადებულები და ვექტორულ წყვილად ითვლებიან. ეს იმას ნიშნავს, რომ 1972 წელს დაბადებული ადამიანი მბრძანებელია, 1954 წელს დაბადებული კი – მისი მონა, ეს კი ქმნის საკონფლიქტო სიტუაციებს. საერთო ჯამში, მათ შორის ურთიერთობა საშუალოა.
კითხვა: ჩემი შვილი დაიბადა 1992 წლის 11 მაისს, ორშაბათს, 4-დან 5 საათამდე. მაინტერესებს, რა არის მისი კარმული მისია, რომელი პროფესიაა მისთვის მისაღები და წარმატებების მომტანი, ასევე, რომელი ზოდიაქოს ნიშნის ქვეშ დაბადებულ ადამიანთან ექნება კარგი მომავალი?
პასუხი: მისი კარმული მისიაა, მეტად წარმოაჩინოს თავის ხასიათში დადებითი თვისებები; იყოს მეტად ორგანიზებული, მიზანსწრაფული, შეუპოვარი, ნებისყოფიანი, შრომისუნარიანი, ფულის ყაირათიანი მხარჯველი. რაც მეტად იქნება მოწესრიგებული, მით მეტად მიაღწევს წარმატებებს. უნდა იყოს „უხალტურო“ მუშაკი და, თუ რამეს გააკეთებს, მხოლოდ კარგად, მიფუჩეჩების გარეშე უნდა გააკეთოს, ყურადღება მიაქციოს ყველა დეტალს; უნდა იყოს მარტოხელა მებრძოლი, დამოუკიდებელი. გამოავლინოს პასუხისმგებლობის მაღალი გრძნობა, აიღოს საკუთარ თავზე ინიციატივა, გამოავლინოს ლიდერულ-ორგანიზატორული თვისებები. სასიყვარულო-პარტნიორული ურთიერთობისთვის მისთვის კარგია ქალწულის, კუროს, თხის რქის, კირჩხიბისა და თევზების ზოდიაქოს ნიშნის ქვეშ დაბადებული ადამიანები. მოერიდოს ლომსა და მერწყულს. პროფესიებიდან კი მისთვის კარგია და წარმატების მომტანი: საბანკო, ეკონომიკური, სავაჭრო, საფინანსო საქმის ფართო სფერო, პედაგოგიკა, სამხედრო სტრუქტურა, უშიშროების სფერო, სადაზღვევო და საგამომძიებლო სფეროები, მშენებლობა, მედიცინის ფართო სპექტრი, ჟურნალისტიკა, რადიო, ტელევიზია, პრესა, სარეკლამო და საგამომცემლო ინდუსტრია, სოციოლოგია, ტელემექანიკა, ლინგვისტიკა.
კითხვა: დავიბადე 1987 წლის 31 ოქტომბერს, ღამის 2 საათზე. რა არის ჩემი კარმული მისია და რომელი პროფესია იქნება ჩემთვის წარმატებული? ასევე, მაინტერესებს, რომელ ქვეყანაში ცხოვრებაა ჩემთვის მიზანშეწონილი?
პასუხი: თქვენი კარმული მისიაა, იყოთ აქტიური, ენერგიული. შეგეძლოთ საკუთარ თავზე ინიციატივის აღება, ლიდერული თვისებების წარმოჩენა, უშიშარი, მებრძოლი სულისკვეთების გამოვლენა. ამავდროულად, დაეყრდენით ინტუიციას და დაიცავით საკუთარი საიდუმლო. იყავით ოპტიმისტი, დაეყრდენით კეთილშობილებას, ცოდნის ბაზას, გამოცდილებას, კომუნიკაბელურობას – ეს თქვენთვის წარმატების მომტანიცაა და კარმულ-კოსმიური მისიაც. უცხოეთში თქვენ ბევრი პრობლემა და ბარიერი გელით, თუმცა, თუ ორგანიზებულობასა და დისციპლინას გამოავლენთ, იქნებით შეუპოვარი და მომთმენი, მაშინ, შესაძლოა, ეს ბარიერები და წინაღობები გადალახოთ. ქვეყნებიდან კარგია: ინგლისი, დანია, სირია; ამერიკის შეერთებული შტატებიდან – ალასკა, ავსტრალია, შვედეთი, ვენესუელა, ყაზახეთი, ვიეტნამის აღმოსავლეთი მხარე, ლაოსი, სინგაპური, მალაიზია, ჩინეთის აღმოსავლეთი ნაწილი, რუსეთიდან – მოსკოვი. პროფესიებიდან კი კარგია და წარმატებების მომტანი: სპორტი, მანქანათმშენებლობა, მანქანების დიზაინი ან ბიზნესი, საინჟინრო სფერო, სამეცნიერო-კვლევითი სფერო, ტექნიკა-მექანიკის ფართო სპექტრი, საკონსტრუქტორო-საგამომგონებლო სფერო, საავიაციო ბიზნესი ან შემოქმედება, სამაშველო საქმიანობა, ხელოვნების ფართო სპექტრი, სამხედრო სტრუქტურები; მედიცინის სფერო ცოტა რთულია, თუმცა, თუ შემართებას გამოიჩენთ, შესაძლოა, წარმატებებს მიაღწიოთ.