სურათები, რომლებიც ამერიკის სააგენტო „ნასას“ თანამგზავრიდანაა მიღებული, გვიჩვენებს, რომ მარტში იაპონიაში მომხდარი მიწისძვრისა და ცუნამის შედეგები საგრძნობი იყო ანტარქტიდაში, სადაც ტალღებმა, რომლებიც შელფურ მყინვარზე იმსხვრეოდა, მას უზარმაზარი აისბერგები მოატეხა.
თანამგზავრული დაკვირვებების მონაცემებით, მეცნიერებმა შეძლეს, დაედგინათ, რომ მარტში მომხდარმა წყალქვეშა მიწისძვრამ ანტარქტიდის ზულცბერგერის ყინულოვანი შელფის შემოგარენში, წყლის დონის 30 სანტიმეტრით აწევა გამოიწვია, რაც საკმარისი აღმოჩნდა, რომ მიწისძვრიდან 18 საათის შემდეგ, შელფიდან რამდენიმე აისბერგი მომწყდარიყო, მათ შორის უდიდესი, ნიუ-იორკის მანჰეტენზე დიდია. ყინულის ლოდების სისქე დაახლოებით 80 მეტრს შეადგენს. უნდა აღინიშნოს, რომ ზულცბერგერის შელფიდან აისბერგები უკანასკნელი 46 წლის განმავლობაში არ მომწყდარა. გავიხსენოთ, რომ 2011 წლის 11 მარტს მომხდარი მიწისძვრა, რომლის მაგნიტუდა მინიმუმ 8,9 ბალს შეადგენდა, მიიაგის პრეფექტურის ზღვის ნაპირებიდან 130 კილომეტრზე მოხდა. მაშინ იაპონიის ნაპირებს თავს დაატყდა 10 მეტრის სიმაღლის ტალღები.