რამ შეიძლება, ტორტი მოგანდომოს საშინელ თბილისურ სიცხეში, თუ არა ისეთმა სილამაზემ, რაც დიზაინერ თეილოს კაფეში მისულ სტუმრებს დაგვხვდა. როგორც აღმოჩნდა, „კულინარიის დღეს“ მსოფლიოს 139 ქვეყანაში აღნიშნავენ და 20 ივლისი უკვე ჩვენთვისაც იქცა ბევრი ტკბილეულის მირთმევის დღედ. დიზაინერ თეილოს „კულინარიის დღის“ სამშობლოდან – ისრაელიდან დაუკავშირდნენ და შესთავაზეს, ეს დღე დღესასწაულად უკვე ჩვენს ქვეყანაშიც ქცეულიყო. „კულინარიის დღის” ჩატარების ექსკლუზიური უფლება თეილოსა და კონდიტერ-დეკორატორ სტელლა ლუზანს აქვთ. ქუდის, ჩემოდნის, ჩაიდნისა და სხვადასხვა ფორმის საკონდიტრო ხელოვნების ნიმუშების დაგემოვნებას მომავალში უკვე მსოფლიოს სხვადასხვა ქვეყანაში შეძლებენ. ქართული საკონდიტრო ნაწარმი კონკურსებზე გავა და სხვა ქვეყნებს, ისევე, როგორც „ევროვიზიაზე“, მისთვის ხმის მიცემის უფლება ექნებათ. მოკლედ, „ტორტების დღეს” უგემრიელესად ჩაეყარა საფუძველი და, დარწმუნებული ვარ „ვალენტინობაზე”, „ჰელოუინზე” და სხვა ბოლო დროს დამკვიდრებულ დღესასწაულზე არანაკლებ მასშტაბურ სახეს მიიღებს.