„უიმბლდონ 2011-ის“ სერბ ტრიუმფატორს, ნოვაკ ჯოკოვიჩს, სამშობლოში დაბრუნებისთანავე, ადგილობრივმა გულშემატკივრებმა გრანდიოზული დახვედრა მოუწყვეს. ბელგრადის ცენტრში შეკრებილ ასი ათასამდე ქომაგს ჯოკოვიჩი ღია ავტობუსიდან მიესალმა და მადლობა გადაუხადა მხარდაჭერისთვის. აღნიშნული ღონისძიების გამო, ბელგრადის ცენტრი რამდენიმე საათით იყო გადაკეტილი და სპეციალურად, გამარჯვების აღსანიშნავად, შუაღამისას, ადგილობრივი ჯგუფების კონცერტი და ფოიერვერკები გაიმართა. შეგახსენებთ, რომ ფინალში ნოვაკ ჯოკოვიჩმა მსოფლიოს მოქმედი პირველი ჩოგანი, ესპანელი რაფაელ ნადალი დაამარცხა და ახლო მომავალში, ახალი რეიტინგის გამოქვეყნებისთანავე, მსოფლიოს ნომერ პირველი ჩოგბურთელის სახელი მოიპოვა.