„ბარსელონას” მცველი ხერარდ პიკე და მისი მეგობარი ქალი, პოპ-ვარსკვლავი შაკირა, დასვენებისთვის გამოყოფილი დღეებით სარგებლობენ და ხმელთაშუა ზღვის კრუიზის ფარგლებში ისრაელს ესტუმრნენ. ისინი პირადად ქვეყნის პრეზიდენტმა, შიმონ პერესმა მიიღო. ვარსკვლავები ებრაულ და პალესტინურ სკოლებს ეწვივნენ, სადაც ბავშვებს საჩუქრები დაურიგეს და მათთან ერთად სამახსოვრო ფოტოებიც გადაიღეს. სასწავლო დაწესებულებებს შაკირა „იუნისეფის” კეთილი ელჩის ამპლუაში ესტუმრა. პიკეს კი „იუნისეფთან” ის აკავშირებს, რომ მისი მშობლიური კლუბის მაისურს სარეკლამო ლოგოს ნაცვლად, სწორედ ამ ორგანიზაციის აბრევიატურა ამშვენებს. საინტერესოა, რომ შაკირას ვიზიტს ისრაელში გამოხმაურება მოჰყვა ეგვიპტეში, სადაც ადგილობრივი მოსახლეობა იმის გამო, რომ შაკირა პერესს შეხვდა, მისი კონცერტის გაუქმებას ითხოვდა, რომელიც ქაიროში 29 ივნისს ჩატარდა. გარდა ამისა, „ფეისბუქში” სპეციალური გვერდი გაიხსნა, სადაც უკმაყოფილო ეგვიპტელების ნაწილი შაკირას პერსონა ნონ-გრატად გამოცხადებას მოითხოვდა.