მადრიდის „რეალისა” და ესპანეთის ნაკრების კაპიტანი – იკერ კასილასი თავის მეგობარ გოგონასთან სარა კარბონერისთან ერთად, ჩრდილოეთ, ცენტრალურ და სამხრეთ ამერიკაში მოგზაურობს. წყვილი ქვეყნიდან ქვეყანაში გადადის და საქველმოქმედო პროგრამით გათვალისწინებულ ღონისძიებებში იღებს მონაწილეობას. ჩილეში ყოფნისას, კასილასმა უდედმამო ბავშვების დასახმარებლად გამართულ აქციაში მიიღო მონაწილეობა და პროგრამის ფარგლებში, ჩილეს პირველ ლედის, სესილია მორელის შეხვდა, რომელსაც საკუთარი ავტოგრაფით დამშვენებული ხელთათმანები აჩუქა. მექსიკაში კი, იქაურმა ლამაზმანმა, ეროტიკული ფოტოსესიებით განთქმულმა ჟურნალისტმა, გაბრიელა ელიზონდომ, იკერისგან ინტერვიუს ჩაწერა მოინდომა. თუმცა, კატეგორიული უარი მიიღო სარასგან, რომელსაც ადგილობრივი პრესის ცნობით, უბრალოდ, შეეშინდა სექსუალური გაბრიელასი და ეჭვიანობისგან იკერს სცენებიც კი გაუმართა. სხვათა შორის, საკუთარ „ტვიტერში” გაბრიელამ ამ ფაქტთან დაკავშირებით მოკლე კომენტარი გააკეთა – მექსიკელები მშვიდობიანი ხალხი ვართ და სხვის მამაკაცებს არ ვერჩით.