* 1883 წლის 27 სექტემბერს, ცნობილი მწერლის, ივანე ტურგენევის დაკრძალვას 179 სხვადასხვა ორგანიზაციისა და საზოგადოების წარმომადგენლები ესწრებოდნენ. ერთ-ერთი ყველაზე დიდი და ლამაზი თაიგული რუსეთის ცხოველთა დაცვის საზოგადოებამ მიიტანა, რომელზეც მხოლოდ ორი სიტყვა ეწერა: „მუმუს ავტორს“.
* ამერიკაში თითქმის ყველგან არის პატარა მაღაზიები, სადაც შეგიძლიათ ნებისმიერი წვრილმანის ყიდვა: სიგარეტის, „კოკა-კოლის“, გაზეთების... თუმცა, ოფიციალურად აკრძალული აქვთ, გაყიდონ... გასაღები.
* ამერიკული სისტემის ფერადი ტელევიზიის დანერგვისას, ექსპერიმენტებში, რომლითაც უნდა განსაზღვრულიყო ფერების გადაცემის ხარისხი, ერთ ოთახში დააწყვეს სხვადასხვა ფერის ხილი, მეორეში კი პროექტის ავტორები დასხდნენ და ეკრანზე დაინახეს: წითელი ვაშლი, ნარინჯისფერი ფორთოხალი, მწვანე ყურძენი და... ლურჯი ბანანი. ინჟინრები პანიკაში ჩაცვივდნენ, იფიქრეს, რომ პროექტი ჩავარდა... მაგრამ, აღმოჩნდა, რომ ერთ-ერთმა ლაბორანტმა იხუმრა და ბანანი ლურჯად შეღება.
* 1916 წელს, ციურიხში, კაბარე „ვოლტერში“, სქელტანიან ფრანგულ-გერმანულ ლექსიკონში უკუღმა ჩადეს დანა, რომელიც სიტყვა Dada-ზე აღმოჩნდა... და წარმოიშვა ლიტერატურულ-მხატვრული ჯგუფის სახელწოდება – „დადაელები“.
* ქართველებს ცეცხლთან დაკავშირებით გვაქვს გამოთქმა – „ცეცხლის ენები“, რუსები ხანძარს „წითელ მამალს“ ეძახიან, თათრები – „წითელ თხას“.
* ცნობილია, რომ ყველაზე ხშირად ხანძრის გაჩენის მიზეზი გაუფრთხილებლობაა, მეორე ადგილზეა ელექტროგაყვანილობის, ტექნიკის გაუმართაობა, შემდეგ მოდის მეხის დაცემა. ზოგიერთ ქვეყანაში კი ერთ-ერთ პირველ ადგილზე იყო ქარის წისქვილის ფრთების ღერძის გადახურება ძლიერი ქარის დროს.