25 ივნისს, ჯანსუღ კახიძის ცენტში, „ნიკორას” მხარდაჭერით, ჯგუფ „კაფდაღის” („კავკასიის მთა”) კონცერტი გაიმართა. „კაფდაღი” სტამბოლში მოქმედი ერთადერთი ქართული ჯგუფია, რომელიც 2004 წელს განახლდა. ამ დიდ საქმეს სათავეში ედგნენ იბერია მელაშვილი და მისი მეუღლე, ქალბატონი ეკა ირემაძე. იბერია მელაშვილი თურქეთში მცხოვრებ ქართველთა შორის ერთ-ერთი გამორჩეული მოღვაწეა. მას განუზომელი წვლილი აქვს შეტანილი მეზობელ ქვეყანაში ქართული კულტურის შენარჩუნებასა და განვითარებაში. სხვათა შორის, ჯგუფის ხელმძღვანელი, ბაიარ შაჰინის პედაგოგი იყო. იბერია ახმედ მელაშვილის ვაჟია. ცნობილია, რომ იმ დიდი დამსახურებისთვის, რაც ახმედ მელაშვილს მიუძღვის ეთნიკური ქართული კულტურის გადარჩენის თვალსაზრისით, ქართველმა ერმა მას „მეოცე საუკუნის თურქეთში მცხოვრებ ქართველთა ილია ჭავჭავაძე” უწოდა. ჯგუფის რეპერტუარში უმთავრესი ადგილი ქართულ ხალხურ სიმღერებს უკავია, ამასთანავე სრულდება კავკასიური და ასევე, თურქული ხალხური შემოქმედების საუკეთესო ნიმუშებიც.