რამდენიმე წლის წინ გადაღებული და ეკრანზე ცოტა ხნის წინ გასული ფილმი „უშენოდ, მგონი, მოვკვდები” მოსკოვის 33-ე საერთაშორისო კინოფესტივალზე მოხვდა. კინოფესტივალზე ვიპ-სტუმრებად მიწვეულები არიან ფილმის პროდიუსერი არჩილ გელოვანი, რეჟისორი ლევან თუთბერიძე და მსახიობები შორენა ბეგაშვილი და გიორგი ზანგური. ეს ფესტივალი ერთ-ერთი ყველაზე პრესტიჟულია მსოფლიოში, რაზეც ჟიურის წევრების შემადგენლობაც მეტყველებს: ჩარლი ჩაპლინის შვილი, მსახიობი ჯერალდინა ჩაპლინი, რეჟისორები ამოს გიტაი, არტურო რინშტეინი და ნიკოლაი დასტალი. როგორც ჩვენთვის ცნობილი გახდა, მსახიობი შორენა ბეგაშვილი ფესტივალის ორგანიზატორების სპეციალური მოწვევით ჩადის. როგორც ჩანს, მისით უკვე რუსული კინოც დაინტერესდა, რაც მსახიობისთვის ძალიან კარგი და ახალი გამოცდილება იქნება. 

 ჯგუფი მოსკოვში 27 ივნისს მიემგზავრება და თბილისში, იმედია, განსაკუთრებული პრიზებით ხელდამშვენებული, ხუთი დღის შემდეგ დაბრუნდება.