მსოფლიოს 100 ყველაზე სექსუალური ქალის სიაში, რომელიც მამაკაცების ჟურნალმა FHM-მ შეადგინა, მოხვდა 19 წლის ავსტრალიელი მანეკენი, ბოსნიური წარმოშობის ანდრეი პეჟიჩი, რომელმაც 98-ე ადგილი დაიკავა.

„98-ე ადგილი FHM-ის სიაში უკვე წარმატებაა!“ – ასეთი იყო პეჟიჩის რეაქცია. ავსტრალიელმა გაუსწრო მომღერალ ლედი გაგას და ბრაზილიელ ლამაზმანს  – იზაბელ გულარს.

FHM-ის განცხადებაში ხაზგასმულია, რომ რედაქციამ თავის დროზე შეამჩნია შეცდომა და გამოასწორა, მაგრამ საიტზე სექსუალურ ქალთა რეიტინგში 98-ე ადგილზე ანდრეის სახელი კვლავ ჩანს, თუმცა, სტატია მის შესახებ ამოღებულია და მის ადგილზე განთავსებულია ბოდიშის მოხდის ტექსტი.  

მამაკაცი, რომელიც ძალიან ჰგავს ქალს, ამ სიაში მკითხველთა კენჭისყრის შედეგების მიხედვით მოხვდა. ანდრეი პეჟიჩი ბოსნია-ჰერცოგოვინაში დაიბადა. როდესაც მას 8 წელი შეუსრულდა ოჯახი ავსტრალიაში, ქალაქ მელბურნში გადავიდა. ანდრეი პოდიუმზე ფოტომოდელად სკოლის წლებიდან მუშაობს. 2010 წელს მან ხელი მოაწერა კონტრაქტს ლონდონის სააგენტო Storm Models-თან. იგი მონაწილეობს როგორც მამაკაცების, ასევე ქალების კოლექციების ჩვენებებში. ანდრეის ოცნებაა, გახდეს სააგენტოს „ანგელოზი“. აქამდე ამ სააგენტოს ყველა „ანგელოზი“ ქალი იყო.