თქვენ ფიქრობთ, ძალიან დავშორდით ქვის ხანას და მასთან აღარაფერი გვაკავშირებს? მაშინ, მოუყარეთ თავი საჭირო თანხას და გაემგზავრეთ ინდონეზიაში, კუნძულ ახალ გვინეაზე, დასავლეთ პაპუას პროვინციაში. მოსახლეობა აქ პაპუასებია – თავადაც ხომ მიხვდით. კუნძულზე სხვადასხვა ენაზე მოლაპარაკე 5 000 პატარა ტომი ცხოვრობს. მათ სრულად აქვთ შენარჩუნებული საუკუნოვანი პირველყოფილი ტრადიციები, ანუ, ხელუხლებელი პირველყოფილი მშვენიერება სწორედ იქ, იმ ჯუნგლებშია. არც ნატო ადარდებთ, არც ევროკავშირი და ცხოვრობენ ბედნიერად, ყოველგვარი ბრენდებისა და „ფეშენ-ვიქების“ გარეშე, მაგრამ, ერთი პრობლემა მაინც აქვთ: ზოგიერთი ტომი გადაშენების გზაზეა, მაგალითად: ჩამბუ, გიამბუ, კამანო, ეკარი, უმბუ-უნგუ... მათი რიცხობრივი შემადგენლობა ასსაც აღარ აღემატება და, შეიძლება, მალე საერთოდაც გაქრნენ...