კითხვა: სასარგებლოა თუ არა მანდარინი?

პასუხი: კანადელი მეცნიერები დარწმუნებულები არიან, რომ მანდარინი ერთ-ერთი საუკეთესო საშუალებაა სიმსუქნის, შაქრიანი დიაბეტისა და ათეროსკლეროზის წინააღმდეგ. გამოკვლევების მსვლელობაში მათ აღმოაჩინეს მანდარინში ნივთიერება ნობილეტინი, რომელიც ხელს უშლის ზემოთ ჩამოთვლილი დაავადებების განვითარებას.

კითხვა: რა ასაკში უნდა მივიდეთ სპეციალისტთან კბილების გასასწორებლად?

პასუხი:  როგორც კი მუდმივი კბილები ამოიჭრება და მშობლები შენიშნავენ კბილების ან ყბების მდებარეობაში დარღვევებს.

კითხვა: შეიძლება თუ არა ორსულობის დაგეგმვა საშვილოსნოს ყელის ეროზიის დროს, თუ ჯერ მკურნალობაა საჭირო? 

პასუხი: სანამ ორსულობას დაგეგმავთ, საჭიროა „ფარული“ ინფექციების გამორიცხვა, ნაცხის ჩაბარება ციტოლოგიაზე და შესაძლოა, საშვილოსნოს ყელის ბიოფსიაც.  გამოკვლევების შემდეგ გადაწყდება, სამკურნალოა ეროზია ორსულობამდე თუ მშობიარობიდან 2 თვეში. საშვილოსნოს ყელის ინფექცია შეიძლება, აღმავალი ინფექციის წყარო აღმოჩნდეს.

კითხვა:  მაქვს პირველი ტიპის ჰერპესი, ვარ ორსულად და თითქმის ყოველთვე მახსენებს თავს. რა გართულება შეიძლება, მოჰყვეს ამას და როგორ ვიმკურნალო?

პასუხი:  ნებისმიერი ტიპის ჰერპესის ვირუსმა შეიძლება საშვილოსნოსშიდა ინფექცია გამოიწვიოს. ვირუსის საწინააღმდეგო მკურნალობა ორსულობის დროს დასაშვებია მხოლოდ უკიდურეს შემთხვევაში. ორსულობის დროს ძირითადად გამოიყენება იმუნიტეტის გამაძლიერებელი პრეპარატები. 

კითხვა: როგორ მოქმედებს კონიაკი სისხლძარღვებზე? შეიძლება თუ არა მისი დალევა მომატებული შიდა ქალის წნევის დროს?

პასუხი: ალკოჰოლი  აფართოვებს სისხლძარღვებს, კონიაკი არ არის გამონაკლისი. 30 გრამამდე ალკოჰოლი დღე-ღამეში ამცირებს მიოკარდის ინფარქტის საშიშროებას, მაგრამ მომატებული შიდა ქალის წნევის დროს, კატეგორიულად აკრძალულია.

კითხვა:  რა ხდება ორგანიზმში ცილების უკმარისობის დროს?

პასუხი: ცილების საგრძნობი უკმარისობის დროს ვითარდება შეშუპებები, კუნთების სისუსტე, ზრდაში ჩამორჩენა, A, B12, D, K და სხვა ავიტამინოზები, რაც ასევე მოქმედებს კლინიკურ სურათზე.

რუბრიკას უძღვება

ოჯახის ექიმი